Հայաստանում ՀՆԱ-ի նկատմամբ հարկերի հարաբերակցությունը 2025թ․–ի վերջին կկազմի 24.5%. նախարար

ԵՐԵՎԱՆ, 21 հունվարի․/ԱՌԿԱ/․ Հայաստանում հարկերի և ՀՆԱ-ի հարաբերակցությունը 2025 թվականի վերջին կկազմի 24.5%՝ մոտենալով 25% թիրախային ցուցանիշին։

Այս մասին այսօր 2025 թվականի ամփոփիչ մամուլի ասուլիսի ժամանակ հայտարարեց ֆինանսների նախարար Վահե Հովհաննիսյանը։

Նա նշեց, որ հարկեր-ՀՆԱ-ի հարաբերակցությունը բարելավվել է՝ գերազանցելով 2025 թվականի բյուջեով պլանավորված ցուցանիշները։

«Մենք ամեն տարի թիրախավորել ենք 0.5 տոկոսային կետով հարկեր-ՀՆԱ-ի բարելավում։ Եթե ամեն ինչ մեր կանխատեսումների շրջանակում լինի, ամենայն հավանականությամբ, մենք կունենանք 1 տոկոսային կետով հարկեր-ՀՆԱ-ի բարելավում 2024 թվականի համեմատությամբ», – ասաց Հովհաննիսյանը։

Նրա խոսքով՝ սա կարևոր է, քանի որ հարկերի հավաքումը բավականին դրական միջավայր է ստեղծել ծախսային պարտավորությունների իրականացման համար։

Պետական եկամուտների կոմիտեի տվյալներով՝ 2025 թվականին Հայաստանում ապահովվել են 2,72 տրիլիոն դրամի հարկային եկամուտներ և մաքսատուրքեր, ինչը գերազանցում է 2024 թվականի ցուցանիշը ավելի քան 334,3 միլիարդ դրամով կամ 14%-ով, իսկ 2025 թվականի պետական բյուջեի մասին օրենքով սահմանված ցուցանիշը՝ 0,2%-ով։