Շիրակի թեմի առաջնորդ Միքայել արքեպիսկոպոս Աջապահյանը առողջական պատճառներով չի կարողանա մասնակցել հունվարի 13-ին նշանակված դատական նիստին, հայտարարել է արքեպիսկոպոսի պաշտպանական խումբը։
Իզմիրլյան բժշկական կենտրոնի տվյալներով՝ արքեպիսկոպոսն այժմ հետվիրահատական բուժում է ստանում և բժշկական պատճառներով չի կարող մասնակցել դատական նիստին։
Աջապահյանը 2025 թվականի հոկտեմբերի 3-ին դատապարտվել էր 2 տարվա ազատազրկման՝ «իշխանությունը զավթելու հրապարակային կոչերի» համար։ Նա չի ընդունում մեղադրանքը:
ԱԺ «Հայաստան» խմբակցության պատգամավոր Գառնիկ Դանիելյանը դեկտեմբերի 15-ին հայտնել էր, որ Շիրակի թեմի բանտարկված առաջնորդին դեկտեմբերի 16-ին կտեղափոխեն «Իզմիրլյան» ԲԿ, որտեղ նրան կվիրահատեն: Սրբազանն ինքն էր նախընտրել այս բժշկական կենտրոնը: Միքայել արքեպիսկոպոսը դեկտեմբերի 16-ին տեղափոխվել էր Երևանի «Իզմիրլյան» բժշկական կենտրոն։ Աջապահյանը վիրահատվել էր դեկտեմբերի 26-ին։
