Դոնալդ Թրամփին ներկայացվել են Թեհրանի նկատմամբ հնարավոր գործողությունների տարբերակները
ԵՐԵՎԱՆ, 13 հունվարի․/Նովոստի–Արմենիա/․ ԱՄՆ նախագահ Դոնալդ Թրամփին ներկայացվել են Թեհրանի նկատմամբ հնարավոր գործողությունների տարբերակները։
Ինչպես նշում է «Կոմերսանտը»՝ հղում անելով ամերիկյան լրատվամիջոցներին, ռազմական հնարավոր սցենարի առանցքային տարր են դիտարկվում օդային հարվածները։ Աղբյուրները մատնանշում են, որ Պենտագոնը միաժամանակ մշակում է նաև տևական հակամարտության տարբերակներ։ Դրանց թվում են, ըստ լրատվամիջոցների, կիբերտիրույթում իրականացվող գործողությունները և այսպես կոչված «հոգեբանական արշավները», որոնք ուղղված են Իրանի հրամանատարական կառույցների, կապի համակարգերի և պետական լրատվամիջոցների աշխատանքի խաթարմանը։
Այս ֆոնին ԱՄՆ վարչակազմում պահպանվում են տարաձայնություններ։ Սպիտակ տան բարձրաստիճան պաշտոնյաները, ներառյալ ԱՄՆ փոխնախագահ Ջեյ Դի Վենսը, ըստ The Wall Street Journal-ի, կողմ են դիվանագիտական կարգավորմանը և նախագահին կոչ են անում զերծ մնալ ուժային սցենարից։
Միևնույն ժամանակ, ինչպես հայտնում է ՌԲԿ-ն՝ հղում անելով WSJ-ին, ինքը՝ Դոնալդ Թրամփը, ներկայումս հակված է ռազմական հարվածներ արտոնելու հնարավորությանը՝ դրանք շաղկապելով Իրանում բողոքի ցույցերի դաժան ճնշման հետ։ Նմանատիպ տեղեկատվություն է հաղորդում նաև Axios-ը՝ նշելով, որ վարչակազմի աշխատակիցների մի մասը նման հարվածները համարում է հակաարդյունավետ։
Միաժամանակ, ըստ The Wall Street Journal-ի, Սպիտակ տանը քննարկվում է միջուկային ծրագրի շուրջ բանակցություններ վարելու վերաբերյալ Թեհրանի վերջին առաջարկը։ Թրամփն ավելի վաղ լրագրողներին հայտարարել էր Իրանի՝ երկխոսության պատրաստակամության մասին։
