Ֆրանսիան և Մեծ Բրիտանիան պատրաստ են մասնակցել «բազմազգ ուժերի» դիտորդական գործողությանը՝ Մոսկվայի և Կիևի միջև ապագա խաղաղության համաձայնագիրն ապահովելու համար: Այս մասին չորեքշաբթի՝ դեկտեմբերի 31-ին, հայտնել է Die Welt թերթը՝ հղում անելով եվրոպական դիվանագիտական աղբյուրներին:
Թերթի տվյալներով՝ բրիտանացի և ֆրանսիացի զինվորականները ԵՄ ներկայացուցիչների հետ միասին, արդեն մշակել են Ուկրաինայի անվտանգության երաշխիքներ տրամադրելու ծրագրերը: Ավելին՝ Ֆրանսիան և Մեծ Բրիտանիան պատրաստ են իրենց զորքերն ուղարկել դիտորդական առաքելությանը մասնակցելու համար նույնիսկ առանց ՄԱԿ-ի կամ Եվրամիության մանդատի: Նրանց անհրաժեշտ է միայն պաշտոնական Կիևի համաձայնությունը:
Die Welt-ի աղբյուրների համաձայն, նման դիտորդական առաքելության ծրագիրը նախատեսում է, որ ֆրանսիական և բրիտանական զորքերը կարող են կրակ բացել անհրաժեշտության դեպքում՝ հրադադարը պահպանելու համար: Քննարկվում է նաև այլ անանուն եվրոպական երկրների զորքերի մասնակցությունը: Դիվանագետները գնահատում են, որ հրադադարի առաջին ամիսներին նման «միջազգային ուժերի» թիվը կարող է տատանվել 10․000-ից մինչև 15․000 զինվորի սահմաններում:
«Բազմազգ ուժերը» պետք է ապահովեն Ուկրաինայի անվտանգությունը ծովից և օդից, ինչպես նաև հարևան երկրներից: Die Welt-ը չի նշում բոլոր երկրների անունները, բայց ենթադրվում է, որ Թուրքիան ևս կարող է էական դեր խաղալ դիտորդական առաքելության մեջ, մասնավորապես՝ Սև ծովում: