2025 թվականին Ադրբեջանում ոչ մարտական իրավիճակներում մահացել է առնվազն 42 զինծառայող։ Այս մասին ասվում է Կասպիական ռազմական հետազոտությունների ինստիտուտի 2025 թվականի զեկույցում, փոխանցում են ադրբեջանական լրատվամիջոցները։
Զեկույցի համաձայն՝ նրանցից 12-ը մահացել են տարբեր հիվանդություններից, 10-ը ինքնասպանություն են գործել, 7-ը մահացել են ավտովթարներից, 7-ը՝ տարբեր վթարներից (ձնահոսք, ջրահեղձություն, ժայռից ընկնել, գազի արտահոսք), 2-ը՝ անօրինական գործողություններից, 2-ը՝ ականների պայթյուններից, ևս 2-ը՝ անհայտ պատճառներով։
Մահացած զինծառայողներից 24-ը Պաշտպանության նախարարության, 11-ը՝ Պետական սահմանապահ ծառայության, 2-ը՝ Արդարադատության նախարարության, 2-ը՝ Արտակարգ իրավիճակների նախարարության, 1-ը՝ Նախագահական անվտանգության ծառայության և 1-ը՝ Ներքին զորքերի զինծառայողներ էին։ Հնարավոր չի եղել որոշել, թե զորքերի որ տեսակում է ծառայել 1 մարդ։ Հաղորդվում է, որ նրանցից 25-ը զինվորներ էին, 7-ը՝ սպաներ, 6-ը՝ ենթասպաներ, 2-ը՝ կուրսանտներ։
Զեկույցում նշվում է, որ 2025 թվականին տարբեր պատճառներով վիրավորվել կամ կամ թունավորվել է առնվազն 11 զինծառայող։ Նրանցից 1-ը վիրավորվել է 2023 թվականի սեպտեմբերի 19-ին Ղարաբաղում Ադրբեջանի կողմից իրականացված ռազմական գործողության հետևանքով, 3-ը թունավորվել է, իսկ 7-ը՝ վիրավորվել ականի պայթյունի հետևանքով։
2024 թվականին Ադրբեջանում մահացել էր 51 զինծառայող, որոնցից 49-ը՝ ոչ մարտական զոհեր։
Ռազմական հետազոտությունների ինստիտուտի տնօրեն Ջասուր Մամեդովը նշել է, որ ոչ մարտական կորուստների պատճառը կոռուպցիան է։
«Չնայած ռազմական ծախսերը մեծանում են՝ բյուջեից հատկացվող գումարը զինվորներին չի հասնում: Զինվորների ապահովության և կենսապայմանների հարցում առաջընթաց չկա: Խնդիրների լուծումը կապված է Ադրբեջանի՝ պայմանագրային բանակի անցման հետ: Քանի դեռ բանակում լուրջ բարեփոխումներ չեն իրականացվում, և բանակի ապահովվածությունը չի համապատասխանեցվում ժամանակակից չափանիշներին, զինվորների մահերը կշարունակվեն»,-հայտարարել է նա:
Թարգմանությունը՝ Էմմա Չոբանյանի