Միքայել արքեպիսկոպոս Աջապահյանի աջակիցներն «Իզմիրլյան» բժշկական կենտրոնի դիմաց են. եկել են շնորհավորելու Սրբազանի ծննդյան օրը:
Սաղմոսավանքի հոգևոր հովիվ Տեր Փառեն քահանա Առաքելյանը նույնպես ներկա է, նշեց, որ եկել են նախևառաջ իրենց որդիական պարտքը կատարելու։
«Միքայել սրբազանը մեր նվիրյալ հոգևորականներից է, որից ամեն օր սովորում ենք և կարելի է սովորել… Ցավոք, այս պայմաններում ենք շնորհավորում, եկել ենք առողջություն մաղթելու և ցանկություն հայտնելու, որ մյուս տարի իր ծննդյան տոնը ոչ թե այստեղ նշենք, այլ գնանք Գյումրիի Յոթ Վերք եկեղեցում միասին աղոթք անենք և կարողանանք իր աջը համբուրել»,- ասաց նա:
Տեր Փառենը կարծում է, որ Միքայել սրբազանի տրամադրությունը պետք է մարտական լինի՝ ինչպես բնորոշ է նրան, բայց նաև՝ ցավով ողողված, որովհետև կուզենար այսօր ոչ թե անկողնում պառկած լինել, այլ դրսում՝ աղոթքի կանգնած:
Հիշեցնենք, որ նախօրեին Սրբազանը վիրահատվել է։ Վիրահատությունն անցել է բարեհաջող։
Ավելի ուշ բժշկական կենտրոնը հայտարարություն է տարածել․
«Միքայել սրբազանի առողջական վիճակով անհանգստացող մարդիկ՝ հաշվի առնելով ձեր բազմաթիվ հարցումները՝ տեղեկացնում ենք, որ Շիրակի թեմի առաջնորդ Միքայել արքեպիսկոպոս Աջապահյանն «Իզմիրլյան» ԲԿ-ում վիրահատվել է։ Այժմ գտնվում է Անեսթեզիոլոգիայի, վերակենդանացման և վիրահատական բաժանմունքում, ստանում է հետվիրահատական բուժում։ Միքայել սրբազանի առողջական վիճակի մասին այլ մանրամասներ հայտնել չենք կարող, քանի որ դրանք համարվում են բժշկական գաղտնիք»։