Զավեշտով լի է ՔՊ-ական իշխանության քաղաքական կուրսը։
Կառավարության դեկտեմբերի 25-ի նիստում հաստատվեց ԲՏԱՆ կողմից ներկայացված «Տեսալսողական մեդիայի մասին» օրենքում փոփոխություններ և լրացումներ կատարելու մասին ՀՀ օրենքի նախագիծը։ Դրանով նախատեսվում է սահմանել նոր դրույթ, ըստ որի՝ կարգելվի օտարերկրյա տեսալսողական ծրագրերում Հայաստանի ներքաղաքական կյանքին միջամտող բովանդակության տարածումը։
Խորհրդային բռնազավթումից ազատագրված մեր բախտակից երկրներում վաղուց փակվել են ռուսական ալիքները։ ՀՀ ազգային մուլտիպլեքսով հեռարձակվում են ռուսական հեռուսաալիքները։ ՀՀ-ում ռուսական ալիքների փակման թեման նորոգվում է նախընտրական շրջանում։ Հիշեցնենք, որ ԵՄ-ն 15 մլն եվրո է տրամադրել Հայաստանին 2026-ի ընտրություններում ռուսական միջամտությունը կանխելու համար։ Բայց Նիկոլ Փաշինյանի կառավարությունը ռուսական ալիքները փակելու մասին որոշում ընդունելու փոխարեն, օրակարգ է բերում այսպիսի օրենք, որով ընդամենն արգելվում է ռուսական ալիքներին ներքաղաքական կյանքին միջամտող բովանդակության տարածել։
Իսկ ի՞նչ է հասկանում ՔՊ-ական իշխանությունը «ներքաղաքական կյանքին միջամտող բովանդակություն» ասելով։
Նախորդ տարիներին և հիմա էլ ռուսական ալիքներով, մասնավորապես՝ ռուսական 1-ին ալիքով պարբերաբար անդրադարձ է կատարվում Հայաստանին առնչվող խնդիրներին, Հայաստանի քաղաքական դիրքորոշմանը, հայ-ռուսական հարաբերություններին և այլն։ ՔՊ-ական իշխանությունը դրանց արձագանքում է միայն այն պարագայում, երբ խիստ վատաբանում, ծաղրում են Նիկոլ Փաշինյանին։ Մյուս բոլոր դեպքերում ՔՊ-ին չի հետաքրքրում ՀՀ ներքաղաքական կյանքին անդրադարձող բովանդալությունը։
ՔՊ-ի՝ այս կարևոր հարցին այսպիսի վերաբերմունքը հիրավի զավեշտալի է, ոչ համարժեք։ Այսպիսով՝ ՔՊ-ական իշխանությունը ցույց է տալիս, որ ռուսամետ կուրս է վարում։ Հարկ է նկատել, որ ռուսական ալիքների ազգային մուլտիպլեքսով հեռարձակումն ինքնին տեղեկատվական սպառնալիք է, քանի որ ՌԴ-ն չի ճանաչում ՀՀ ինքնիշխան իրավունքները։ Մոսկվային դեռ թվում է, թե ՀՀ-ն ռուսական ֆորպոստ է, ինչպես 2018-2022-ին։ Մեր երբեմնի բախտակից երկրներն այս տրամաբանությամբ են փակել ռուսական ալիքները։
ԵՄ-ն 15 մլն եվրո է տվել, որ չեզոքացվի ռուսական ազդեցությունը ՀՀ ԱԺ 2026-ի ընտրություններին։ Ռուսական ազդեցության ազդեցիկ գործիքներից են ռուսական ալիքները, հատկապես՝ ռուսական հանրային հեռուստաալիքը՝ ռուսական 1-ինը՝ ОРТ-ն, որը հեռարձակվում է ՀՀ ազգային մուլտիպլեքսով։ Եթե ՀՀ-ն իրապես ԵՄ-ին անդամակցելու գործընթաց է սկսել, ապա առաջին հերթին ռուսական ալիքները պիտի փակեր։ Իսկ ՔՊ-ն ОРТ-ն փակելու փոխարեն, ընդամենը մեկ դրույթ է ներառում օրենքում, թե՝ ներքաղաքական կյանքի միջամտությունն արգելվում է։
Պարզ ասած՝ այս նախագծով հավելյալ ապացուցվեց, որ ԵՄ-ին անդամակցելու գործընթաց իրականում չկա, Մոսկվան շարունակելու է քարոզչական գործիքներով ազդել ընտրությունների վրա՝ փորձելով դուրս թողնել անկախության ու ժողովրդավարության ջատագով ուժերին, իսկ ՔՊ-ն մնում է վառ ռուսամետ ուժ։
Թաթուլ Մկրտչյան