Ադրբեջանի մշակույթի նախարարությունը հայտնել է, որ Բաքվում տեղի է ունեցել այսպես կոչված Իրևանի պետական ադրբեջանական դրամատիկական թատրոնի բացման արարողությունը, որը տեղի է ունեցել Ադրբեջանի նախագահ Իլհամ Ալիևի հրամանով իրականացված խոշոր վերանորոգումից և վերակառուցումից հետո։
Մշակույթի նախարար Ադիլ Քերիմլին, թատրոնի աշխատակազմը, մշակույթի գործիչները, այսպես կոչված Արևմտյան Ադրբեջանի համայնքի ներկայացուցիչները և խորհրդարանի անդամները զննել են վերանորոգված շենքը։ Թատրոնի ժամանակավոր տնօրենը հյուրերին ներկայացրել է վերանորոգման աշխատանքները, ժամանակակից ենթակառուցվածքները և նոր հնարավորությունները։
Դրանից հետո տեղի է ունեցել բացման արարողությունը և թատերախմբի հետ հանդիպումը։ Միջոցառմանը ելույթ են ունեցել մշակույթի նախարար Ադիլ Քերիմլին, այսպես կոչված Արևմտյան Ադրբեջանի համայնքի նախագահ և խորհրդարանի անդամ Ազիզ Ալեքբարլին, Թատերական աշխատողների միության նախագահ և ժողովրդական արտիստ Հաջի Իսմայիլովը և այլք։