Google-ի Gemini 3 արհեստական բանականությամբ օգնականը ստացել է նոր հնարավորություն․ այն այժմ կարող է տեքստային նկարագրության հիման վրա ստեղծել YouTube Playables հարթակի համար նախատեսված մինի խաղեր։ Այս մասին հայտնում է 9to5Google-ը։
YouTube-ում մինի խաղերի Playables բաժինը գործարկվել էր անցյալ տարի, իսկ այժմ խաղերի ստեղծումը դարձել է հասանելի գրեթե բոլորի համար։ Ծրագրավորման գիտելիքներ այլևս չեն պահանջվում․ բավական է խաղի գաղափարը նկարագրել տեքստով, և Gemini 3-ը կստեղծի համապատասխան խաղը։
Նախաձեռնության նպատակը պարզ է՝ հնարավորություն տալ օգտատերերին հաշված րոպեների ընթացքում ստեղծել պարզ և զվարճալի խաղեր ու անմիջապես կիսվել դրանցով իրենց լսարանի հետ YouTube-ում։ Խաղերը հասանելի են ինչպես բջջային հավելվածներում, այնպես էլ հարթակի վեբ տարբերակում։
Խաղերի ստեղծման համար մշակվել է հատուկ վեբ գործիք՝ Playables Builder անունով, որի շրջանակում իրականացվում են բոլոր գործողությունները։ Gemini-ին կարելի է տրամադրել ոչ միայն տեքստային նկարագրություն, այլև պատկերներ՝ խաղի տեսողական ոճը փոխանցելու համար, ինչպես նաև վիդեոներ, որոնք ցույց են տալիս ցանկալի խաղային մեխանիկան։
Այս պահին YouTube Playables Builder-ը գտնվում է բետա փորձարկման փուլում։ Ծրագրին կարող են միանալ կամավորները՝ լրացնելով հատուկ հայտ YouTube հարթակում և նշելով իրենց ալիքի տվյալները։ Մասնակիցներն ընտրվում են սահմանափակ երկրների շրջանակում, իսկ հաստատված օգտատերերին Google-ը տրամադրում է առանձին մուտքային տվյալներ, որոնք տարբերվում են հիմնական Google հաշվի մուտքից։