Վրաստանի նախկին նախագահ Միխեիլ Սաակաշվիլին իր ֆեյսբուքյան էջում շնորհավորական ուղերձ է հղել Ադրբեջանի նախագահ Իլհամ Ալիևի ծննդյան օրվա կապակցությամբ։
Գրառման մեջ ասվում է. «Այսօր ադրբեջանական ժողովրդի և ամբողջ Կովկասի մեծ զավակի՝ Իլհամ Ալիևի ծննդյան օրն է։ Իլհամը հասավ այն ամենին, ինչի մասին մենք բոլորս երազում ենք. նա ազատագրեց ադրբեջանական հողերը և հաստատեց խաղաղություն՝ Ադրբեջանը վերածելով համաշխարհային քաղաքականության շատ կարևոր խաղացողի։ Ժամանակակից պատմության մեջ քիչ համաշխարհային առաջնորդներ կարող են պարծենալ նման նվաճումներով։ Կարելի է վստահորեն ասել, որ Իլհամ Հեյդարովիչը ոսկե տառերով է գրել իր անունը պատմության մեջ, և նրան կհիշեն դարեր շարունակ»։
Միխեիլ Սաակաշվիլին արտահայտել է նաև իր հպարտությունը, «որ հնարավորություն է ունեցել ընկերանալու և սերտորեն համագործակցելու նախագահ Ալիևի հետ»։
Վրաստանի նախկին առաջնորդը նշել է, որ Ադրբեջանի նախագահ Իլհամ Ալիևը «շարունակում է ազնվության և անսասանության օրինակ ծառայել ամբողջ ազգի արժանապատվությունը պաշտպանելու գործում։ Հենց այսպիսին պետք է լինի իսկական առաջնորդը՝ մեկը, ով չի վախենում հակառակվել ռեժիմին և հասնում է արդյունքների»։ «Երկար կյանք նրան և բարգավաճում նրա երկրին»,- մաղթել է Վրաստանի նախկին նախագահը։