2025 թվականի հունվարի 1-ին տարվա առաջին հարցազրույցը արվեստագետ Արման Գրիգորյանի հետ էր՝ նրա «Բռնակալներին սպանողները» ստեղծագործության շուրջ։ Այն ժամանակ դժվար էր պատկերացնել, որ այդ զրույցը լինելու էր վերջինը, և շատ չանցած ստիպված էինք լինելու խոսել արդեն նրա հիշատակին նվիրված ցուցահանդեսների մասին։
Արման Գրիգորյանը ոչ միայն արվեստ էր ստեղծում, այլև ձևավորում էր մշակութային միջավայր ու արժեքներ՝ հիմնված մարդկային ջերմ կապերի վրա։ «Արման Գրիգորյան. Ընկերներին» խորագրով ցուցահանդեսը տեղի ունեցավ Նկարիչների միության հենց այն «Երրորդ հարկում», որի հիմնադիրներից էր նաև ինքը։ Սա նախագիծ էր՝ նվիրված ընկերության գաղափարին՝ մի արժեքի, որն առանցքային էր Արմանի թե՛ կյանքում, և թե՛ ստեղծագործական ուղում։
Ցուցահանդեսի համադրողները՝ «Ականաթ» ցուցասրահի հիմնադիր Անի Սուքիասյանը և արվեստագետ Հարություն Սիմոնյանը, ներկայացնում են նախագծի կարևոր շեշտադրումները։ Սա Արման Գրիգորյանի յուրօրինակ հետահայաց ցուցահանդեսն էր, որի համար հեղինակները որոշել էին հավաքել և մեկտեղել բոլոր այն գործերը, որոնք Արմանը տարիների ընթացքում սիրով նվիրել էր իր ընկերներին։