Դեկտեմբերի 22-ին Իրանը հրթիռային զորավարժություններ է անցկացրել երկրի տարբեր մասերում, հայտնում է Reuters-ը՝ հղում անելով տեղական լրատվամիջոցներին։
Մասնավորապես, իրանական Nournews լրատվական գործակալության տելեգրամյան ալիքը հրապարակել է տեսանյութեր, որոնք, ամենայն հավանականությամբ, ցույց են տալիս հրթիռների արձակումները։ Ըստ լրատվամիջոցների՝ հրթիռներ են արձակվել մայրաքաղաք Թեհրանի մոտակայքում, ինչպես նաև Սպահան և Մաշհադ քաղաքներում։
Սակայն Reuters-ը նշում է, որ իրանական պետական լրատվամիջոցները՝ հղում անելով «տեղեկացված աղբյուրներին», ավելի ուշ հերքել են հրթիռային փորձարկումները՝ պնդելով, որ տեսանյութերում երևում են «մեծ բարձրության վրա թռչող ինքնաթիռներ»։
Axios-ը, հղում անելով աղբյուրներին, հաղորդել է, որ իսրայելցի պաշտոնյաները Թրամփի վարչակազմին զգուշացրել են, որ Իրանի Իսլամական հեղափոխության պահապանների կորպուսի կողմից անցկացվող հրթիռային զորավարժությունները կարող են լինել Իսրայելի վրա հարվածի նախապատրաստություն։
Ըստ աղբյուրների՝ Իսրայելի պաշտպանության բանակի շտաբի պետ Էյալ Զամիրը դեկտեմբերի 20-ին զանգահարել է ԱՄՆ կենտրոնական հրամանատարության հրամանատար Բրեդ Քուփերին և տեղեկացրել նրան Իսրայելի մտահոգությունների մասին՝ կապված Իսլամական հեղափոխության պահապանների կորպուսի հրթիռային զորավարժությունների հետ։ Զամիրի խոսքով՝ «վերջերս Իրանի հրթիռային տեղաշարժերը և այլ գործառնական քայլերը կարող են լինել անակնկալ հարձակման քողարկում»։
Միաժամանակ, հրատարակությունը, հղում անելով ամերիկյան աղբյուրին, նշում է, որ ԱՄՆ հետախուզությունը ներկայումս որևէ տեղեկություն չունի Իրանի կողմից Իսրայելի վրա սպասվող հարձակման մասին:
NBC News-ը հայտնել էր, որ Իսրայելի վարչապետ Բենիամին Նեթանյահուն նախատեսում է առաջիկա հանդիպման ժամանակ ԱՄՆ նախագահ Դոնալդ Թրամփին տեղեկացնել Իրանի դեմ հնարավոր նոր հարվածների մասին:
