Ստուգման նպատակով կանգնեցված մեքենայում 102կգ սիգ է հայտնաբերվել
ԵՐԵՎԱՆ, 19 դեկտեմբերի․/Նովոստի–Արմենիա/․ Ոստիկանությունը հետևողականորեն շարունակում է արգելված ժամանակահատվածում Սևանա լճից սիգ տեսակի ձկան որսի կանխարգելման և ապօրինի որսի դեպքերի բացահայտման ուղղությամբ միջոցառումները:
Ապօրինի որսի հերթական դեպքը ջրային պարեկները բացահայտել են դեկտեմբերի 18-ին, հաղորդում է ՀՀ ոստիկանությունը։
Երևան-Սևան-Դիլիջան ճանապարհին ջրային պարեկները ստուգման նպատակով կանգնեցրել են «Օպել» մակնիշի մի մեքենա, որ բեռնված էր սիգ տեսակի ձկներով: Սևան քաղաքի բնակիչ 42-ամյա վարորդը, մեքենայով հանդերձ, տեղափոխվել է Համայնքային ոստիկանության Սևանի բաժին:
Մեքենայում առկա մոտ 102 կգ սիգ տեսակի ձկան վերաբերյալ նա հայտնել է, որ ձեռք է բերել Վարդենիս համայնքում՝ անծանոթ քաղաքացուց:
Կազմված փաստաթղթերը փոխանցվել են նախաքննական մարմին։
