Ուհանի վիրուսաբանության ինստիտուտը, Ուհան քաղաքի իշխանությունները եւ Չինաստանի գիտությունների ակադեմիան հայց են ներկայացրել Միսուրիի նահանգի իշխանությունների, այդ նահանգի սենատոր Էրիկ Շմիտի եւ տարածաշրջանի նախկին գլխավոր դատախազ Էրիկ Բեյլիի դեմ՝ ավելի քան 50 մլրդ դոլարի չափով, անվանարկման համար՝ կապված COVID-19 վիրուսի ծագման մասին նրանց հայտարարությունների հետ։ Այս մասին նշվել է այն փաստաթղթում, որը հրապարակել է Շմիտը իր կայքում։
«Սենատոր Էրիկ Շմիտը (հանրապետական, Միսսուրի) հայտարարել է, որ կոմունիստական Չինաստանը դատական հայց է ներկայացրել եւ 50 միլիարդ դոլարի իրավաբանական արշավ է սկսել իր դեմ։ Առաջին դատական հայցը, որը ներկայացվել է Ուհանի ժողովրդական կառավարության, Չինաստանի գիտությունների ակադեմիայի եւ Ուհանի հայտնի վիրուսաբանության ինստիտուտի կողմից, թիրախավորում է Շմիտին եւ Միսուրի նահանգին՝ 2020թ․ Չինաստանի դեմ իրենց դիրքորոշման համար, COVID-19 համավարակի առաջացման եւ սրման վերաբերյալ»,- ասել է օրենսդիրը մամուլի հաղորդագրության մեջ։
Դիմումին կցված հայցադիմումում նշվել է, որ Չինաստանի ներկայացուցիչները պահանջում են, որ պատասխանողները պաշտոնապես ներողություն խնդրեն ամերիկյան եւ չինական խոշոր լրատվամիջոցներից եւ ընդունեն «քաղաքացիական պատասխանատվություն բացասական հետեւանքները վերացնելու եւ հայցվորների հեղինակությունը վերականգնելու համար»։ Հայցվորները նաեւ պահանջում են 356 միլիարդ յուանի կամ մոտավորապես 50,6 միլիարդ դոլարի փոխհատուցում, որը երեք պատասխանողներն էլ պետք է «համատեղ վճարեն»։
2020թ․ Շմիտը, որն այն ժամանակ Միսուրիի գլխավոր դատախազն էր, դատական հայց է ներկայացրել Չինաստանի կառավարության դեմ՝ պնդելով, որ Չինաստանը թաքցրել է COVID-19-ի տարածման մասին տեղեկատվությունը։ 2025թ․ գարնանը Միսուրիի դաշնային դատարանը բավարարել է Շմիտի հայցը եւ պարտավորեցրել Պեկինին վճարել 24 միլիարդ դոլար: Միսուրիի ներկայիս գլխավոր դատախազ Քեթրին Հենաուեյի հայտարարության համաձայն՝ դատարանի որոշումից հետո Միսուրիի պաշտոնյաները հավաքել են փաստաթղթեր՝ պետդեպարտամենտի միջոցով Չինաստան ուղարկելու համար: Հենաուեյը պնդել է, որ Չինաստանի ներկայացուցիչները «հրաժարվել են ներկայանալ ԱՄՆ դատարան»:
Հունվարի վերջին The New York Times թերթը, հղում կատարելով սեփական աղբյուրներին, հաղորդել էր, որ ԱՄՆ Կենտրոնական հետախուզական վարչությունը հակված է այն տեսությանը, որ COVID-19 համավարակը սկսվել է Չինաստանի Ուհան քաղաքի լաբորատորիայից վիրուսի արտահոսքով։ Մայիսին ԱՄՆ նախագահ Դոնալդ Թրամփը հայտարարել էր, որ համավարակի առաջին օրերից ինքը վստահ է եղել, որ COVID-19 հարուցիչը տարածվել է Չինաստանի Ուհան քաղաքի հետազոտական լաբորատորիայից։
Ուհանի վիրուսաբանության ինստիտուտը Չինաստանի միակ լաբորատորիան է, որը հավաստագրված է BSL-4 ստանդարտով՝ կենսաանվտանգության ամենաբարձր մակարդակով։