Ֆիլիպ Կիրկորովը «Կոմսոմոլսկայա պրավդա» ռադիոկայանի ուղիղ եթերում անդրադարձել է իր նախկին կնոջ՝ Ալլա Պուգաչովայի հասցեին հնչած քննադատությանը, որը լքել էր Ռուսաստանը 2022 թվականին: 58-ամյա երգիչը կարծիք է հայտնել, որ նրա դեմ ուղղված մեղադրանքներից շատերը անհիմն են, ինչպես նաև հիշեցրել է, որ Պուգաչովան մեծ ներդրում է ունեցել ռուսական փոփ-երաժշտության մեջ և միշտ մնացել է պարկեշտ մարդ։
Կիրկորովը ընդգծել է, որ լավ է ճանաչում Պուգաչովային և բոլորից լավ հիշում է, թե որքան ջանք է նա ներդրել այլ արտիստներին օգնելու համար: Նա ասել է, որ հենց երիտասարդ կատարողներին աջակցելու համար է նա ստեղծել «Սուրբ Ծննդյան հանդիպումներ» ծրագիրը 1980-ականների վերջին, երբ սկսնակ արտիստները դժվարանում էին մտնել ասպարեզ: Երգիչը նաև հիշեցրել է, որ նույն ժամանակահատվածում Հայաստանում տեղի է ունեցել հզոր երկրաշարժ, և Պուգաչովան իր համերգներից ստացված ողջ հասույթը նվիրաբերել է տուժածներին օգնելու համար: «Նա բոլորին հնարավորություն է տվել ինքնադրսևորվել: Եվ հիմա նորաձև է դարձել մեղադրել Պուգաչովային», – հավելել է Կիրկորովը։
«Եվ կարևոր չէ, թե որտեղ է հիմա Ալլա Պուգաչովան, կարևոր չէ, թե ինչ հարաբերություններ ունենք։ Բայց ես ճշմարտության կողմակիցն եմ։ Այս մարդը երբեք ոչ մեկին չի արգելել, երբեք ոչ մեկին չի նվաստացրել։ Հետևաբար, եկեք հարգենք նրա ստեղծագործականությունը, նրա կյանքի իրավունքը և ընտրելու, թե որտեղ է ապրում, ում հետ է ապրում և ինչպես է ընտրում ապրել։ Սա նրա անձնական իրավունքն է։ Ես իրավունք չունեմ դատելու։ Ես այն մարդն եմ, ով մտերիմ է եղել և ապրել է նրա հետ բավականին երկար ժամանակ։ Եվ, իհարկե, ես կարոտում եմ նրան որպես մարդ, որպես ընկեր», – եզրափակել է նա։