Մամուլն այսօր գրել էր, որ Նիկոլ Փաշինյանը Աշխարհի և Եվրոպայի կրկնակի չեմպիոն Նազիկ Ավդալյանին առաջարկվել է ընդգրկվել «Քաղաքացիական պայմանագիր» կուսակցության նախընտրական ցուցակում։
«Նիկոլ Փաշինյանն օրեր առաջ ընդունել է ծանրամարտի Աշխարհի և Եվրոպայի կրկնակի չեմպիոն Նազիկ Ավդալյանին եւ բարձր է գնահատել նրա անձնական ներդրումը միջազգային ասպարեզում Հայաստանը լավագույնս ներկայացնելու եւ մեր երկրում սպորտի զարգացմանը նպաստելու գործում։ Ավելին՝ այնքան բարձր է գնահատել սպորտսմենի ներդրումը, որ ըստ «Իրավունք»-ին հասած լուրերի` անգամ պատրաստվում է նրան ներառել «Քաղաքացիական պայմանագիր» կուսակցության նախընտրական ցուցակում»,- գրում է «Իրավունք»-ը՝ հիշեցնելով, որ տարիներ առաջ ևս նմանատիպ լուրեր էին շրջանառվում, սակայն Ավդալյանը կտրականապես հերքել էր դրանք։
Oragir.News-ը կապ հաստատեց Նազիկ Ավդալյանի հետ՝ հասկանալու համար, թե որքանո՞վ է մամուլում տարածված տեղեկությունը համապատասխանում իրականությանը։
Ի պատասխան՝ Ավդալյանի փիար-մենեջերը մեզ վերջինիս անունից փոխանցեց՝ եթե Նազիկ Ավդալյանը մտնի քաղաքականություն, ապա հասարակությունն այդ մասին կիմանա իրենից, ոչ թե մամուլը կհայտնի այդ մասին։
«Ես դեռ չեմ հասունացել, որ մտնեմ քաղաքականություն: Ես այսօր իրականացնում եմ հասարակական գործունեություն միտված մարզերում սպորտի զարգացմանը: Իմ նախագիծը, բնականաբար, պահանջում է պետական աջակցություն: Ես հիմա զբաղվում եմ հասարակական գործունեությամբ, անում եմ իմ գործը, իսկ դեղին մամուլը և ֆեյքերը իրենց գործը»,- ընդգծեց նա։