Հայաստանը հաշվի առնում է, նաև ակտիվ աշխատում է, որ «Թրամփի ուղին» հարգի Իրանի կենսական շահերը, Tasnim գործակալությանն ասել է Իրանում Հայաստանի դեսպան Գրիգոր Հակոբյանը։
Նա հայտարարել է, որ Երևանն Ադրբեջանի ու ԱՄՆ-ի հետ եռակողմ պայմանավորվածությունների շրջանակներում գործել է բարիդրացիության, ինքնիշխանության և փոխվստահության սկզբունքներից ելնելով և պաշտոնապես հաշվի է առել Իրանի կենսական շահերը՝ Թեհրանի հետ ակտիվ երկխոսություն պահպանելով տարբեր մակարդակներում:
Հիշեցնելով, որ օգոստոսի 8-ին Վաշինգտոնում Հայաստանի, Ադրբեջանի և ԱՄՆ ղեկավարների կողմից ստորագրված հայտարարության մեջ նշված է, որ Հայաստանի տարածքով Ադրբեջանի հիմնական տարածքի և Նախիջևանի միջև անարգել հաղորդակցության ապահովումը կիրականացվի «Թրամփի երթուղի հանուն միջազգային խաղաղության և բարգավաճման» (TRIPP) ծրագրի շրջանակներում, Հակոբյանը շեշտել է՝ Հայաստանի հարավով անցնող երթուղին պաշտոնապես անվանվում է բացառապես «Թրամփի երթուղի», իսկ ցանկացած այլ անվանում, ներառյալ «միջանցք» տերմինը, հակասում է ստորագրված հայտարարության ոգուն և բովանդակությանը:
Անկարան ու Բաքուն շարունակում են այս երթուղին կոչել «Զանգեզուրի միջանցք»: Իսկ Իրանի գերագույն հոգևոր առաջնորդի միջազգային հարցերով ավագ խորհրդական Ալի Աքբար Վելայաթին Հակոբյանի հետ հանդիպմանն ասել էր, որ այսպես կոչված՝ «Թրամփի ծրագիրը Կովկասի վերաբերյալ ոչնչով չի տարբերվում «Զանգեզուրի միջանցքից», և Իսլամական Հանրապետությունը կտրականապես դեմ է դրան»:
Ինչ վերաբերում է Հայաստանի և Ադրբեջանի միջև խաղաղ բանակցությունների ներկա փուլին, ապա Իրանում ՀՀ դեսպանն ասել է, որ վերջին ամիսներին կարգավորման գործընթացում զգալի և սկզբունքային տեղաշարժեր են տեղի ունեցել:
