Զանգակատուն համայնքի բնակիչների քվեարկության համաձայն՝ տեղի միջնակարգ դպրոցի բակից կհեռացնեն Լևոն Թոքմաջյանի հեղինակած՝ բանաստեղծ Պարույր Սևակի արձանը, տեղեկանում ենք պոետի տուն-թանգարանի հրապարակումից։
Ըստ հայտարարության՝ բնակիչների 79,9%-ը կողմ է քվերակել արձանի հեռացմանն, իսկ 20,1%-ը դեմ արտահայտվել։
Արձանի տեղադրումից ի վեր համացանցը ողողված էր քանդակի ու նրա հեղինակի շուրջ բացասական գրառումներով, հումորային անդրադարձներով։ Ի վերջո բանաստեղծի հարազատները հայտարարեցին, որ համայնքին են թողել վերջնական որոշումը։ Թոքմաջյանն ինքը մամուլի հետ զրույցում դեմ էր արտահայտվել հարցը համայնքի քննարկմանը դնելուն։
«Պատկերացրեք՝ ուր ենք հասել, որ գյուղացին պետք է որոշի՝ քանդակը դրվի, թե չդրվի: Ես պատվեր չեմ ստացել, որ քննարկում են: Նվեր եմ տվել, նախօրոք ուղարկել եմ նկարները, գյուղապետն է տեղյակ, Սևակի թոռն է տեղյակ, տեսել են, ասել են՝ բեր: Թող ասեին՝ մի բեր, ես էլ չէի տանի: Արվեստի գործը դնում են գյուղացիների քվեարկությա՞նը, քննարկմա՞նը»,- ասել էր նա։
Քանդակագործը պարզաբանել էր, որ դա ոչ թե Սևակի, այլ «Անլռելի զանգակատուն» թեմայով աշխատանք է, ինչպես ինքն է ընկալում այն։
