«Պատերազմի մասնակիցների մասնագիտական ներուժի բացահայտում». շահառուների անհատական պլանների մշակման փուլն է

Օրերս մեկնարկել են «Պատերազմի մասնակիցների մասնագիտական ներուժի բացահայտում» ծրագրի նոր՝ չորրորդ փուլի շահառուների հետ անհատական հանդիպումները, որոնց ընթացքում ծրագրային թիմը մշակում և վերջնական տեսքի է բերում յուրաքանչյուր մասնակցի անհատական զարգացման պլանը։

Այս մասին հայտնել է «Իմ քայլը» հիմնադրամը:

«Այս փուլում, մասնագիտական կողմնորոշման ճամբարից հետո, շահառուները ստանում են վերջին խորհրդատվությունները և ուղղորդումներն իրենց գաղափարների և պլանների շուրջ։ Նրանցից շատերն արդեն պատրաստվում են մասնակցել բիզնեսի պլանավորման ու կառավարման կամ նախընտրած նեղ մասնագիտական ոլորտների դասընթացներին։

Ընտրված ուղղությունները բազմազան են՝ սկսած գյուղատնտեսությունից մինչև արտադրություն, տարաբնույթ մասնագիտություններից մինչև մեղվաբուծություն։ Այս գործընթացը ոչ միայն օգնում է մասնակիցներին հստակ քայլերով առաջ գնալ դեպի իրենց ուղին, այլև մոտեցնում է այն օրվան, երբ այս քննարկման սեղանի շուրջ ծնված գաղափարները կդառնան իրականություն։

Հիշեցնենք, որ այս փուլի շահառուները Արագածոտնի, Սյունիքի, Տավուշի և Գեղարքունիքի մարզերից են։ Ծրագրային թիմը արդեն հանդիպել է Սյունիքի և Գեղարքունիքի մասնակիցներին: Շուտով հանդիպումները կանցկացվեն նաև Տավուշի և Արագածոտնի մարզերում։

«Երբ այս փուլն էլ հաջողությամբ ավարտենք, կհաստատենք, որ ծրագիրը հաջողությա,բ իրականացրել ենք ՀՀ բոլոր մարզերում, և կմնա միայն Երևանը։ Այդ փուլին մոտենում ենք ավելի ոգևորված, ներշնչված ու նոր ուժերով՝ հաշվի առնելով այն աննկարագրելի արդյունքները, որոնք արդեն գրանցել ենք մարզերում։Մինչ այսօր՝ ծրագրին մասնակցել է 164 հաշմանդամության կարգ ձեռք բերած մասնակից: Նրանցից 108-ն այսօր ունի ֆինանսավորված բիզնես, իսկ 56-ը վերապատրաստվել է իր նախընտրած ոլորտում»,- նշում է հիմնադրամի փոխտնօրեն Թալին Թօփալաքեանը:

Պատերազմի մասնակիցների մասնագիտական ներուժի բացահայտման ծրագրի նպատակն է նպաստել պատերազմի ընթացքում վիրավորում ստացած, պատերազմի մասնակիցների սոցիալ-տնտեսական վերաինտեգրմանը՝ աշխատելու մոտիվացիան խթանելու միջոցով: Միջազգային փորձը ցույց է տալիս, որ տնտեսական ինտեգրումն ամենաարդյունավետ ճանապարհն է ապահովելու անհատի ներգրավումը հասարակության մեջ, քանի որ այն նպաստում է վերջինիս ֆինանսական կայունությանը, ինքնաբավությանը և սոցիալական բարօրությանը»,- ասված է հաղորդագրության մեջ:

«Հայկական Ժամանակ»-ը Telegram-ում