Դեկտեմբերի 13-ին Հայաստանի ամենանշանավոր գիտամշակութային կենտրոններից մեկը՝ Մեսրոպ Մաշտոցի անվան Մատենադարանը, հյուրընկալել է «Իմ քայլը» հիմնադրամի «Մշակութային ճամփորդություն Հայաստանում» ծրագրի 51 շահառուներին՝ կրթամշակութային նոր այցի շրջանակում։
Այս մասին հայտնել է հիմնադրամը:
«Արագածոտնի մարզի հետաքրքրասեր փոքրիկները մասնակցեցին Մատենադարանում իրականացվող ինտերակտիվ կրթամշակութային ծրագրերից երկուսին՝ կազմված իրենց տարիքային խմբերին համապատասխան բովանդակությամբ և գործնական բաղադրիչով։ Այցի նպատակն էր երեխաներին ոչ միայն ծանոթացնել հայ գրի և ձեռագրական մշակույթի պատմությանը, այլև հնարավորություն տալ այդ գիտելիքը կիրառել գործնական աշխատանքի միջոցով։
Ծրագիրը կոչվում էր «Այբուբենների համակարգը և Մաշտոցի գյուտը», որի տեսական հատվածում նրանք բացահայտեցին գրի զարգացման ուղին, տարբեր այբուբենների միջև գոյություն ունեցող նմանություններն ու տարբերությունները, գրի տեսակներն ու զարդագրերը, ինչպես նաև հայոց գրերի ստեղծման բացառիկ նշանակությունը հայ ժողովրդի պատմության և ինքնության պահպանման գործում, իսկ գործնական հատվածում երեխաները սովորեցին զարդագիր ձևով գրել իրենց անվան սկզբնատառը:
Հաջորդ ինտերակտիվ ծրագիրը կոչվում էր «Ինչպես են ծնվում ձեռագրերը», որի ընթացքում երեխաներն իմացան, թե որտեղ և ինչպես են միջնադարում ստեղծվել հայերեն ձեռագիր մատյանները, ինչ նյութեր են օգտագործվել գրանյութի պատրաստման համար, ինչպես են ստացվել թանաքն ու բնական ներկերը։ Ստացած գիտելիքները ամրապնդվեցին գործնական հատվածում՝ «Այլ կերպ» խաղի միջոցով, որն առավել հետաքրքիր և դինամիկ դարձրեց ուսումնական գործընթացը։
Ծրագրի շրջանակում երեխաները նաև իրականացրին թեմատիկ շրջայց Մատենադարանում՝ գիդերի ուղեկցությամբ այցելելով ձեռագրերի սրահներ և ծանոթանալով հայ միջնադարյան գրավոր ժառանգության բացառիկ նմուշներին։
Այս կրթամշակութային այցը ևս մեկ քայլ էր դեպի այն նպատակն, որ հեռավոր համայնքներում ապրող, արվեստի և գիտելիքի հանդեպ հետաքրքրություն ունեցող երեխաները ունենան հավասար հնարավորություն ճանաչելու Հայաստանի հարուստ մշակութային ժառանգությունը և զգալու դրա կենդանի ներկայությունը»,- ասվում է հաղորդագրուրթյան մեջ:
«Հայկական Ժամանակ»-ը Telegram-ում
Տպել
43 դիտում