Փաստաբան Մարինե Ֆարմանյանը անդրադարձել է դատավորների որոշումներին։
ԵՐԵՎԱՆ, 13 դեկտեմբերի – Sputnik. Արդարադատության համակարգը Հայաստանում հիվանդ է, և այն պետք է բուժվի, հակառակ դեպքում հայտնի չէ, թե ինչ հանգրվանի կտանեն ապօրինությունները։ Այս մասին լրագրողների հետ զրույցում ասաց փաստաբան Մարինե Ֆարմանյանը` պատասխանելով Sputnik Արմենիայի հարցին, թե ինչպես եղավ, որ դատավոր Արմինե Մելիքսեթյանը 2 տարվա ազատազրկման դատապարտեց Շիրակի թեմի առաջնորդ Միքայել սրբազանին, իսկ մահացու ելքով ավտովթարի ենթադրյալ մեղավոր կնոջն օրեր առաջ գրավի դիմաց ազատ արձակեց։
«Ապօրինությունները Արմինե Մելիքսեթյանով չեն սահմանափակվում, և դատարանը չի սկսվում ու ավարտվում նրա գործողություններով։ Մելիքսեթյանը վատ իրավաբան չէ, բայց նա վատ դատավոր է, և այդ վատ դատավորի կարգավիճակը շատ ավելի վտանգավոր է։ Ու նա մենակ չէ, մի քանի այսպիսի անուններ, որոնք շրջանառվում են, մեր պետության արդարադատության ողնաշարը ջարդող գործողությունների հանրագումար են»,– ասաց Ֆարմանյանը։
Փաստաբանը չբացառեց, որ վերոնշյալ դեպքով գուցե հիմքեր եղել են գրավ կիրառելու համար, բայց հավելեց` քանի որ Արմինե Մելիքսեթյանը հասարակական հնչեղություն ունեցող գործերով արդեն ապօրինություն է արել, նրա ոչ մի որոշում այլևս արժանահավատ լինել չի կարող։