Եգիպտոսցի նախկին ֆուտբոլիստ Ահմեդ Էլմոհամադին աջակցություն է հայտնել իր հայրենակից Մոհամեդ Սալահին։
«Լիվերպուլի» 33-ամյա հարձակվողը լուրջ խնդիրների է բախվել մերսիսայդյան ակումբի հետ՝ հարցազրույցում կոշտ ձևակերպումներով դժգոհություն հայտնելուց հետո։ Ավելի ուշ «կարմիրների» հայտնի նախկին պաշտպան Ջեյմի Կարագերը Սալահի պահվածքը որակեց անպատվաբեր։
«Զարմանալի չէ, որ Ռոնալդուն քեզ անտեսում էր։ Զարմանալի չէ, որ քեզ քննադատում էր Մեսսին։ Զարմանալի չէ, որ Մոուրինյուն քեզ ԱՊԼ-ում 1000 լավագույն պաշտպանների մեջ չմտնող պաշտպան էր համարում։ Ջեյմի, դու քեզ խայտառակել ես։ Սալահն ամեն ինչի հասել է քրտնաջան աշխատանքի և բացառիկ խաղի շնորհիվ։ Նա տարիներ շարունակ իր վրա է տանում Եգիպտոսի հավաքականը և արժանի է այն ամենին, ինչ ունի», — ասել է Էլմոհամադին, ում խոսքերն է մեջբերում Transfer News Live-ը։
Հիշեցնենք, որ Սալահը չէր ընդգրկվել «Լիվերպուլի» հայտացուցակում՝ «Ինտերի» դեմ Չեմպիոնների լիգայի խաղի համար, որում անգլիական ակումբը նվազագույն հաշվով հաղթեց (1-0)։