Մարին Լը Պենի «Ազգային միաբանությունը» ցանկանում է, որ Ֆրանսիայում վերաբացվեն մարմնավաճառների կողմից ուղղակիորեն կառավարվող հասարակաց տները, գրում է Politico-ն։
Կուսակցությունը շուտով կներկայացնի օրինագիծ, որը հնարավորություն կտա հասարակաց տները վերաբացվել որպես կոոպերատիվներ, ֆրանսիական լրատվամիջոցներին տված մի շարք հարցազրույցների շարքում հայտարարել է «Ազգային միաբանության» հայտնի օրենսդիր Ժան-Ֆիլիպ Տանգին։
«Մարմնավաճառները սեփական թագավորությունում կայսրուհիներ կլինեին»,- ֆրանսիական RTL ռադիոկայանին ասել է Տանգին։
Նա նշել է, որ արդեն գրել է տեքստի նախագիծը, որը Լը Պենը ևս աջակցել է։ Հասարակաց տները Ֆրանսիայում արգելվել են 1946 թվականին։ Ըստ ֆրանսիական օրենսդրության՝ մարմնավաճառները դեռ կարող են առաջարկել սեփական ծառայությունները, սակայն Սոցիալիստական կուսակցության՝ 2016 թվականին ընդունված օրենքը հաճախորդներին պատժում է 1500 եվրո տուգանքով։
Այդ առաջարկը վերսկսել է Ֆրանսիայում մարմնավաճառության օրինականացման վերաբերյալ բանավեճը։ Նմանատիպ բանավեճեր են առաջացել նաև ԵՄ այլ երկրներում։
Օրինակ՝ Իտալիայում Ջորջիա Մելոնիի իշխող կոալիցիայի քաղաքական գործիչները ևս պաշտպանում են հասարակաց տների վերաբացումը և մարմնավաճառության կարգավորումը, սակայն այդ առաջարկները դեռևս չեն իրականացվել։