9 դեկտեմբերի 2025 – 10:49 AMT
PanARMENIAN.Net – Էկոնոմիկայի նախարար Գևորգ Պապոյանը դեկտեմբերի 8-ին Հայաստանում Ամերիկայի առևտրի պալատի (AmCham) կազմակերպած միջոցառմանն ունեցած ելույթում կարևորել է օգոստոսի 8-ին Վաշինգտոնում կայացած համաձայնությունը՝ շեշտելով, որ «խաղաղության գործընթացն անցնում ենք աշխարհի թիվ մեկ տնտեսության, թիվ մեկ պետության՝ ԱՄՆ հետ»։
«Համատեղ խոշոր նախագծեր ենք իրականացնում, մասնավորապես՝ TRIPP նախաձեռնությունը, որը մեզ հնարավորություն է տալիս խոսել Հայաստանի և ԱՄՆ-ի միջև տնտեսական հարաբերություններում բացվող բոլորովին նոր հորիզոնների ու հնարավորությունների մասին»,- նշել է Պապոյանը։
Պապոյանն անդրադարձ է կատարել նաև «Խաղաղության խաչմերուկը» նախաձեռնությանը՝ որպես տարածաշրջանային համագործակցության և կայունության մի կարևոր ուղղություն։
Հանդիպման ընթացքում ելույթով հանդես է եկել նաև ԱՄՆ-ի դեսպան Քրիստինա Քվինը, ով ներկայացրել է հայ-ամերիկյան տնտեսական փոխգործակցության և ինստիտուցիոնալ զարգացման խթանմանն ուղղված ռազմավարական ուղղություններն ու առաջնահերթությունները։
Միջոցառման մասնակիցների շարքում են եղել նաև ՄԱԿ-ի Զարգացման ծրագրի (ՄԱԶԾ) մշտական ներկայացուցիչ Նաթիա Նացվլիշվիլին, ՀՀ Կենտրոնական բանկի նախագահ Մարտին Գալստյանը, ԱԺ ֆինանսավարկային և բյուջետային հարցերի մշտական հանձնաժողովի նախագահ Ծովինար Վարդանյանը, էկոնոմիկայի նախարարի տեղակալներ Արման Խոջոյանն ու Անուշիկ Ավետյանը, ինչպես նաև «Enterprise Armenia»-ի ղեկավար Գոհար Աբաջյանը, դիվանագիտական ներկայացուցչությունների ու միջազգային կառույցների պատվիրակներ։
Օգոստոսի 8–ին Սպիտակ տանը կայացած ՀՀ վարչապետ Նիկոլ Փաշինյանի, ԱՄՆ նախագահ Դոնալդ Թրամփի և Ադրբեջանի նախագահ Իլհամ Ալիևի եռակողմ հանդիպմանը ստորագրվել է համատեղ Հռչակագիր` Վաշինգտոնում տեղի ունեցած հանդիպման արդյունքների մասին:
Վաշինգտոնում Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը Հայաստանի, Ադրբեջանի և ԱՄՆ ղեկավարների ներկայությամբ նախաստորագրել են «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» համաձայնագիրը։