Քաղաքականություն
08.12.2025 | 19:28
Օկուպացված Դոնեցկում կայազորի ռազմական դատարանը չորս ռուս զինվորների դատապարտել է մինչև 12 տարվա ազատազրկման՝ ամերիկացի Ռասել Բենթլիի սպանության համար: Այս մասին հայտնել է Հարավային շրջանի ռազմական դատարանի մամուլի ծառայությունը, գրում է Meduza-ն։
Ռասել Բենթլին ծնունդով Թեխասից է։ Նա պատերազմում կռվել է Ռուսաստանի կողմից։ 2014 թվականին Բենթլին միացել է Դոնեցկի մարզի անջատողականներին, մինչև 2017 թվականը ծառայել է Վոստոկ գումարտակում, իսկ ավելի ուշ համագործակցել է «Սպուտնիկ» քարոզչական նախագծի հետ։ Դոնեցկում Բենթլին ամուսնացել է տեղացի կնոջ հետ և դարձել Ռուսաստանի քաղաքացի։
2024 թվականի ապրիլին Ռասել Բենթլին մահացել է Դոնեցկում: Քննչական կոմիտեն սպանության մեղադրանք է առաջադրել չորս ռուս զինծառայողների՝ Վիտալի Վանսյացկիին, Վլադիսլավ Ագալցևին, Վլադիմիր Բաժինին և Անդրեյ Իորդանովին։
Քննիչների տվյալներով՝ 2024 թվականի ապրիլի 8-ին Իորդանովը և Վանսյացկին տեսել են, թե ինչպես է Բենթլին «պատրաստվում նկարահանել հրթիռային հարվածի հետևանքները»: Նրանք ամերիկացուց պահանջել են փաստաթղթեր և զորամասի հրամանատարությանը հայտնել «դիվերսանտին» նույնականացնելու մասին: Նրանք Բենթլիին ստիպել են նստել մեքենա՝ գլխին պարկ հագցնելով: Վանսյացկին, Իորդանովը և Ագալցևը, «ցանկանալով Բենթլիից խոստովանություն կորզել դիվերսիոն և հետախուզական խմբերին մասնակցելու մասին», ծեծել և տանջել են ամերիկացուն, ինչի հետևանքով նա մահացել է:
Դրանից հետո Վանսյացկին և Ագալցևը Բենթլիի մարմինը դրել են մեքենայի բեռնախցիկում և պայթեցրել։ Հաջորդ օրը Բաժինը և Իորդանովը ժամանել են պայթյունի վայր և այրել Բենթլիի մնացորդները։
Վանսյացկին, Իորդանովը և Ագալցևը մեղավոր են ճանաչվել պաշտոնեական լիազորությունների չարաշահման մեջ, որի հետևանքով զոհը մահացել է (Ռուսաստանի քրեական օրենսգրքի 286-րդ հոդվածի 5-րդ մաս)։ Իորդանովին նաև մեղադրանք է առաջադրվել կալանքից կալանքից փախուստի համար (Քրեական օրենսգրքի 313-րդ հոդվածի 1-ին մաս)։ Բաժինին մեղադրանք է առաջադրվել հանցագործությունը թաքցնելու համար (Քրեական օրենսգրքի 316-րդ հոդվածի 2-րդ մաս)։
Դատարանը Վանսյացկիին և Իորդանովին դատապարտել է 12 տարվա ազատազրկման խիստ ռեժիմի ուղղիչ գաղութում, Ագալցևին՝ 11, իսկ Բաժինին՝ մեկուկես տարի ժամկետով ազատազրկման։
Astra-ն պնդում է, որ Բենթլին խոշտանգումների է ենթարկվել և, ենթադրաբար, սպանվել Դոնեցկի լքված Պետրովսկայա հանքում գտնվող «համակենտրոնացման ճամբարում», որտեղ խոշտանգումների են ենթարկվել նրանք, ովքեր հրաժարվել են կռվելուց: Աղբյուրները որպես «համակենտրոնացման ճամբարի» կազմակերպիչ նշել են 5-րդ մոտոհրաձգային բրիգադի փոխհրամանատար Իլյա Իվանովին:
Թարգմանությունը՝ Էմմա Չոբանյանի