Կանադայի հնդկացիների մշակութային արժեքները, որոնք ավելի քան 100 տարի պահվել են Վատիկանի թանգարանում, ժամանել են Կանադա։ Այս մասին հայտնել է СВС հեռուստաալիքը։
Խոսքը 62 արտեֆակտների մասին է, որոնք Հռոմի Պապ Լևոն XIV-ը նոյեմբերին, հանդիսատեսների ներկայությամբ, հանձնել է Կանադայի Կաթոլիկ Եպիսկոպոսների Համաժողովի ներկայացուցիչներին։ Կանադացի հնդկացիներին նախկինում պատկանող ցուցանմուշները կաթոլիկ միսիոներների կողմից տեղափոխվել են Հռոմ 1923-ից 1925 թվականներն ընկած ժամանակահատվածում, որից հետո դրանք տեղափոխվել են Վատիկանի թանգարան։
Ըստ СВС-ի տվյալների՝ արտեֆակտները կտեղադրվեն Գաթինոյի (Քվեբեկ նահանգ) Կանադայի պատմության թանգարանում, մինչև կանադացի հնդկացիների առաջնորդները որոշեն, թե ուր տեղափոխել դրանք։ Հայրենիք վերադարձված արտեֆակտների մեջ կա նաև 4,4 մետր երկարությամբ կայակ, որը հայտնի է որպես «Պապի կայակ» և որն առնվազն 100 տարեկան է։
Կանադացի հնդկացիները տասնամյակներ շարունակ անհաջող կերպով փորձել են այդ արժեքները վերադարձնել հայրենիք։ Իրավիճակը փոխվել է 2021 թվականի մայիսին, երբ Կանադայում, հնդկացի երեխաների համար նախատեսված երեք նախկին գիշերօթիկ դպրոցների տարածքում, որոնք ղեկավարվում էին Հռոմի կաթոլիկ եկեղեցու կողմից, հայտնաբերվել են անչափահասների ավելի քան հազար անանուն գերեզմաններ։ Այս նորությունները ցնցել են հանրությանը, որը պահանջել է իշխանություններից պեղումներ իրականացնել բոլոր նախկին ուսումնական հաստատությունների տարածքում, որոնցից վերջինը փակվել էր 1996 թվականին։ Աշխատանքները շարունակվում են նաև հիմա։
Նաև այդ ժամանակ սկսել են հնչել կոչեր՝ ուղղված Հռոմի կաթոլիկ եկեղեցուն, որպեսզի վերջինս ներողություն խնդրի կանադացի հնդկացիներից, այդ թվում՝ այն ժամանակվա վարչապետ Ջասթին Թրյուդոյի կողմից։ 2022 թվականին Հռոմի Պապ Ֆրանցիսկոսը պաշտոնական ներողություն է խնդրել Կանադայի հատուկ գիշերօթիկ դպրոցներում հնդկացի երեխաների նկատմամբ դաժան վերաբերմունքի համար, իսկ 2024 թվականին Թրյուդոն, Պապի հետ հանդիպման ժամանակ, նաև կոչ է արել նրան վերադարձնել Վատիկանում պահվող Կանադայի հնդկացիների մշակութային արժեքները։