Գերմանիայի կանցլեր Ֆրիդրիխ Մերցը շաբաթ օրը կմեկնի Իսրայել պաշտոնը ստանձնելուց հետո իր առաջին այցով, որպեսզի հաստատի Գազայի պատերազմի ժամանակ խաթարված ավանդական ամուր կապերը, հաղորդել է AFP-ն։
Հորդանանում Աբդուլահ II թագավորի հետ բանակցությունների համար կանգառ կատարելուց հետո Մերցն այսօր երեկոյան կթռչի Իսրայել, որտեղ կիրակի օրը Երուսաղեմում կհանդիպի վարչապետ Բենիամին Նեթանյահուի հետ։ Գերմանիայի առաջնորդը նաեւ կայցելի Հոլոքոստի «Յադ Վաշեմ» հուշարձան։
Շաբաթ առավոտյան Բեռլինից մեկնելուց առաջ Մերցը զրուցել է Պաղեստինի ինքնավարության նախագահ Մահմուդ Աբասի հետ։ Մամուլի քարտուղարը նշել է, որ Մերցն ընդգծել է Գերմանիայի աջակցությունը երկու պետությունների ստեղծման որոշմանը, բայց կոչ է արել Աբասին իրականացնել «անհապաղ անհրաժեշտ բարեփոխումներ» ինքնավարությունում՝ պատերազմից հետո կարգավորման գործում «կառուցողական դեր» խաղալու համար։
Հաշվի առնելով նացիստական Գերմանիայի կողմից հրեաների զանգվածային սպանությունների մութ ժառանգությունը՝ գերմանացի առաջնորդները վաղուց Իսրայելին անսասան աջակցությունը համարել են իրենց արտաքին քաղաքականության անկյունաքարը։ Մյունխենի սինագոգի, որը լրջորեն վնասվել էր նացիստների կողմից, աշխատանքի վերականգնմանը նվիրված սեպտեմբերյան ելույթի ժամանակ Մերցը դժվարությամբ է զսպել է արցունքները, նրա ձայնը խզվում էր։ Սակայն իսրայելա-գերմանական կապերը խաթարվեցին Գազայի պատերազմի ժամանակ, որը սկսվեց ՀԱՄԱՍ-ի կողմից Իսրայելի դեմ 2023թ․ հոկտեմբերի 7-ի հարձակումով, որը երկրի պատմության մեջ ամենամահաբերն էր։
Այս տարվա մայիսին իշխանության եկած Մերցը բազմիցս քննադատել է Իսրայելի չդադարող ռազմական արշավը, որի հետեւանքով զոհվել են տասնյակ հազարավոր պաղեստինցիներ։ Օգոստոսին նա նաեւ առաջարկել է սահմանափակել զենքի վաճառքը Գազայում օգտագործելու համար։
Այն ժամանակվանից հետո, երբ հրադադարի եւ պատանդների վերադարձման փխրուն համաձայնագիրը, որին աջակցում է ԱՄՆ-ը, վերջ դրեց լայնածավալ մարտական գործողություններին, Գերմանիան վերացրեց արտահանման սահմանափակումները։
ՄԱԿ-ը եւս զգուշացնում է, որ Իսրայելը շարունակում է բավարար մարդասիրական օգնություն չտրամադրել Գազային։