ՆԱՏՕ-ի գլխավոր քարտուղար Մարկ Ռյուտեն հայտարարել է, որ Ռուսաստանը, որը «շարունակում է իր անմարդկային պատերազմը Ուկրաինայի դեմ» և սրում է հիբրիդային պատերազմը Արևմուտքում, բախվում է «իրական և երկարաժամկետ սպառնալիքների»։ Նա խոստացել է շարունակել աջակցել Ուկրաինային և հայտարարել, որ ՆԱՏՕ-ի անդամ չհանդիսացող երկրները կմիանան զենքի գնումների ֆինանսավորմանը։
Ըստ Ռյուտեի՝ դաշինքի 32 երկրների երկու երրորդը միացել է Ուկրաինայի առաջնահերթ կարիքների ցանկի (PURL) նախաձեռնությանը, որը նախատեսում է Ուկրաինայի համար ամերիկյան զենք գնելու համար միջոցների հատկացում։ Նրանց համակցված ֆինանսական պարտավորությունները գերազանցել են 4 միլիարդ դոլարը։
Ռյուտեն շեշտել է, որ առաջին անգամ PURL-ին ներդրումներ կկատարեն ՆԱՏՕ-ի անդամ չհանդիսացող գործընկերները, դրանց թվում՝ Ավստրալիան և Նոր Զելանդիան։
Ուկրաինային հիմնականում անհրաժեշտ են օդային և հրթիռային պաշտպանության, մասնավորապես Patriot համակարգեր։ Քանի որ Դոնալդ Թրամփը հրաժարվել է շարունակել Ուկրաինային զենք մատակարարելը, ինչպես արել էր Ջո Բայդենի վարչակազմը, ՆԱՏՕ-ի մյուս երկրները սկսել են միջոցներ հայթայթել զենքի գնման համար։ Օգոստոսի կեսին, երբ առաջին հինգ երկրները միացան PURL-ին, նրանք այդնպատակի համար 1,5 միլիարդ դոլար հատկացրին։
Ռյուտեն միաժամանակ պատասխանելէ Վլադիմիր Պուտինին, որը նախորդ օրը հայտարարել էր, որ չի ցանկանում պատերազմ Եվրոպայի հետ, բայց սպառնում է դրա լիակատար ոչնչացմամբ։ ՆԱՏՕ-ի երկրները «պատրաստ են և վճռականորեն տրամադրված են անել անհրաժեշտ ամեն ինչ» իրենց քաղաքացիներին պաշտպանելու համար։