Փաշինյանը նշել է, որ թոշակներն ավելանում են, պարզապես իրենք հասկանում են, որ կառավարումն ունի նրբություններ, և սովորում են ավելի արդյունավետ կառավարել, ՎԻԴԵՈ
ԵՐԵՎԱՆ, 3 դեկտեմբերի. /Նովոստի Արմենիա/․ Մենք խոստացել ենք, որ առողջապահության ապահովագրություն լինելու է, բայց չեք խոստացել, որ թոշակառուն դրա համար չի վճարելու, և մենք հիմա այս լուծմանն ենք գնում։
Այս մասին այսօր խորհրդարանում հայտարարել է ՀՀ վարչապետ Նիկոլ Փաշինյանը՝ անդրադառնալով թոշակների բարձրացման հարցին։
Վարչապետը հայտնել է, որ թոշակներն ավելանում են, պարզապես իրենք հասկանում են, որ կառավարումն ունի նրբություններ, և սովորում են ավելի արդյունավետ կառավարել։
«Մենք ի՞նչ ենք ասում, ասում ենք՝ թոշակառուների թոշակը ամսական 11․000դրամով կամ 10․400 դրամով ավելացնենք, ի՞նչ է անելու թոշակառուն այդ գումարը։ Մեր հետազոտությունը ցույց է տալիս, որ 65+ տարեկան թոշակառուների առաջնային ծախսը առողջապահությունն է, հիմա հետևաբար ինչի՞ մենք մարդկանց տանք այդ փողը, որ ինքը չիմանա, թե ինչպես այդ փողը արդյունավետ օգտագործի իր առողջապահության համար», – ասաց վարչապետը։
Նրա խոսքով՝ կառավարությունն այդ 10․000 դրամը դնում է առողջության ապահովագրության մեջ և ստեղծում համակարգ, որտեղ թոշակառուն ստանալու է 10․000 դրամից ավելի մեծ չափով ծառայություն։
Փաշինյանը նշեց նաև, որ թոշակն ավելանում է նաև անկանխիկ առևտրի պարագայում, երբ հետվճար են ստանում 2%, ապա ավելանում է նաև Arca քարտերով առևտրի ժամանակ բոլոր քաղաքացիներին տրվելիք հետվճարի դեպքում։