ՀՀ վարչապետ Նիկոլ Փաշինյանը Թուրքիայում ԱՄՆ դեսպան Թոմ Բարաքին կխնդրի փոխանցել ԱՄՆ նախագահ Դոնալդ Թրամփին իր խնդրանքը՝ սահմանները բացելու հարցով ճնշում գործադրել Թուրքիայի նախագահ Ռեջեփ Թայիփ Էրդողանի վրա, գրել է «Հրապարակ» օրաթերթը՝ հղում անելով կառավարությունում իր աղբյուրներին։
Ըստ թերթի՝ Թուրքիայի հետ սահմանների բացման գործընթացն արագացնելու փորձերն առայժմ ոչ մի հաջողության չեն հասնում, և մեծ է հավանականությունը, որ նույնիսկ TRIPP-ի գործարկումից հետո Թուրքիան չի բացի սահմանները։
Լրատվականի տեղեկությամբ՝ վերջնական չէ անգամ 2026 թվականի հունվարից դիվանագիտական անձնագիր ունեցողների համար սահմանի բացումը։
Հոկտեմբերին ՀՀ վարչապետ Նիկոլ Փաշինյանը հայտարարել էր, որ Անկարայի հետ դիվանագիտական հարաբերությունների հաստատումը և սահմանի բացումը միայն ժամանակի հարց են։ Նոյեմբերին Թուրքիայի նախագահ Ռեջեփ Թայիփ Էրդողանը հայտարարել էր, որ Անկարան Բաքվի հետ միաժամանակ շարունակում է հայ-թուրքական հարաբերությունների կարգավորման գործընթացը։ Նոյեմբերին Թուրքիայի արտաքին գործերի նախարար Հաքան Ֆիդանը հայտարարել էր, որ Անկարան կարևորում է Հայաստանի հետ հարաբերությունների կարգավորումը, սահմանի բացումը և տնտեսության վերականգնումը։
