Արարատի մարզի Մասիս խոշորացված համայնքի Դաշտավան բնակավայրի գլխավոր խաչմերուկում տեղի ունեցած ծեծկռտուքի հետևանքով 10-ից ավելի վիրավոր կա, հայտնում է Shamshyan.com-ը։
Ըստ կայքի՝ միջադեպի մասին ահազանգն ստացվել է օգոստոսի 9-ին՝ ժամը 00։30-ի սահմաններում։
Դեպքի վայրում ոստիկանները հայտնաբերել են մեծ թվով քարերի կտորներ, փայտեր, արնանման նամ հետքեր, հողաթափեր, գլխարկներ և այլ իրեր։
Ըստ նախնական տեղեկությունների՝ նշված վայրից բուժօգնություն ստանալու նպատակով Մասիսի հիվանդանոց են դիմել 10-ից ավելի քաղաքացիներ։
Իրավապահ մարմինները միջադեպի հանգամանքների և տուժածների թվի վերաբերյալ պաշտոնական տեղեկություն դեռ չեն հայտնել։
Քաղաքացիները կայքին հայտնել են, որ լսել են նաև կրակոցի ձայներ։ Այս տեղեկությունը ևս պաշտոնապես չի հաստատվել։
