Սաուդյան Արաբիան, Պակիստանը և Թուրքիան Մեքքայում ստորագրել են համատեղ պաշտպանական համաձայնագիր, որով կողմերից որևէ մեկի նկատմամբ զինված հարձակումը կդիտարկվի որպես հարձակում բոլոր երեքի նկատմամբ, հայտնել է Reuters-ը։
«Համաձայնագիրը նպատակ ունի ամրապնդել հավաքական զսպումը ցանկացած ագրեսիայի նկատմամբ և նախատեսում է, որ երեք պետություններից որևէ մեկի դեմ իրականացված զինված հարձակումը կդիտարկվի որպես հարձակում բոլորի դեմ»,- ասվում է գերատեսչության հայտարարությունում։
Փաստաթուղթը ստորագրվել է Սաուդյան Արաբիայի թագաժառանգ Մուհամմեդ բին Սալմանի, Թուրքիայի նախագահ Ռեջեփ Թայիփ Էրդողանի և Պակիստանի վարչապետ Շեհբազ Շարիֆի հանդիպման շրջանակում։ Համաձայնագիրը նախատեսում է նաև երեք երկրների միջև պաշտպանական համագործակցության տարբեր ուղղությունների ընդլայնում։
Reuters-ի տվյալներով՝ փաստաթուղթը ստացել է «Մեքքայի համատեղ պաշտպանական համաձայնագիր» անվանումը։ Գործակալությունը նշել է, որ այն ստորագրվել է տարածաշրջանում անվտանգության իրավիճակի սրման և Սաուդյան Արաբիայի նկատմամբ ռազմական սպառնալիքների աճի պայմաններում։
Եռակողմ համաձայնագրի շուրջ բանակցությունները շարունակվել են առնվազն 2025 թվականից։ 2026 թվականի հունվարին Պակիստանի պաշտպանական արտադրության նախարար Ռազա Հայաթ Հարրաջը հայտնել էր, որ կողմերը պատրաստել են համաձայնագրի նախագիծը և քննարկում են այն։ Նա ընդգծել էր, որ եռակողմ փաստաթուղթը առանձին է Պակիստանի և Սաուդյան Արաբիայի միջև 2025 թվականի սեպտեմբերին կնքված փոխադարձ պաշտպանության համաձայնագրից։
2025 թվականի սեպտեմբերին Իսլամաբադն ու Էր Ռիադը պայմանավորվել էին, որ կողմերից մեկի նկատմամբ ագրեսիան կդիտարկվի որպես ագրեսիա երկու երկրների նկատմամբ։ Նոր համաձայնագրով այդ փոխադարձ պաշտպանության մեխանիզմին միացել է նաև Թուրքիան։
