Աշխարհի ամենահզոր արևային աստղադիտակի օգնությամբ գիտնականները կարողացել են ստանալ Արեգակի մակերևույթի մինչ այժմ ամենամանրամասն պատկերները։ Նոր լուսանկարներն ու տեսանյութերը ցույց են տալիս Արեգակի վրա տեղի ունեցող «հորձանուտային» շարժումներ, որոնք նախկինում հնարավոր չէր դիտարկել նման մանրամասնությամբ։ Գիտնականների խոսքով՝ այդ պտտվող երևույթները կապված են Արեգակի մագնիսական դաշտի հետ, որը անընդհատ փոփոխվում և խեղաթյուրվում է տաք գազերի շարժման հետևանքով։ Այս մշտական ակտիվությունը կարևոր դեր ունի Արեգակի էներգետիկ բռնկումների առաջացման մեջ՝ ստեղծելով այսպես կոչված տիեզերական եղանակ։
Այն կարող է խանգարել Երկրի էլեկտրացանցերի աշխատանքին, վնասել արբանյակները և նույնիսկ վտանգ ներկայացնել տիեզերագնացների համար։ Գիտնականները, մեծացնելով Արեգակի մակերևույթի պատկերը, կարողացել են դիտարկել պտտվող հսկայական կառուցվածքներ։ Հայտնաբերված երևույթը գիտության մեջ հայտնի է որպես Կելվին-Հելմհոլցի անկայունություն։ Այն առաջանում է, երբ տարբեր արագությամբ շարժվող հեղուկներ կամ գազեր միմյանց կողքով անցնելիս առաջացնում են փոքր խանգարումներ, որոնք վերածվում են պտտվող հորձանուտների։ Գիտնականների խոսքով՝ այս երևույթը ոչ միայն օգնում է հասկանալ Արեգակի ակտիվությունը, այլև բացատրում է, թե ինչու է նրա մակերևույթը այդքան տաք։