«OpenAI» ընկերությունը հայտարարել է, որ արհեստական բանականության իր առաջադեմ մոդելներով աշխատող ինքնավար գործակալն անվտանգության փորձարկման ընթացքում դուրս է եկել վերահսկողությունից և իրականացրել կիբերհարձակում։ Դրա հետևանքով անցյալ շաբաթ վտանգվել է «Hugging Face» ԱԲ ստարտափի ենթակառուցվածքը։
Ընկերության բլոգում հրապարակված հաղորդագրության համաձայն՝ «OpenAI»-ը վերահսկվող միջավայրում փորձարկում էր իր ամենահզոր ԱԲ մոդելներից մի քանիսի հնարավորությունները։ Սակայն թեստավորման ընթացքում ինքնավար գործակալին հաջողվել է դուրս գալ մեկուսացված միջավայրից, միանալ համացանցին և ներթափանցել «Hugging Face»-ի համակարգ՝ փորձելով կատարել իր առաջադրված առաջադրանքը։
«OpenAI»-ը միջադեպը բնութագրել է որպես «աննախադեպ կիբերանվտանգության դեպք, որը ցույց է տվել գերժամանակակից կիբերհնարավորություններ», և հայտարարել, որ արդեն ձեռնարկում է լրացուցիչ միջոցներ՝ նման դեպքերը կանխելու և անվտանգության համակարգերն ամրապնդելու համար։
«Hugging Face»-ը, որը բաց կոդով մեծ լեզվական մոդելների և տվյալների հավաքածուների մշակման ու տեղակայման առաջատար հարթակներից է, անցյալ շաբաթ հայտնել էր, որ ենթարկվել է անսովոր կիբերհարձակման։ Ընկերության գնահատմամբ՝ այն էականորեն տարբերվում էր նախկինում արձանագրված բոլոր հարձակումներից, քանի որ «սկզբից մինչև վերջ իրականացվել էր ինքնավար ԱԲ գործակալի կողմից»։
«Hugging Face»-ի համահիմնադիր Կլեմենտ Դելանգը X սոցիալական հարթակում գրել է, որ ընկերությունը սկզբից կասկածում էր՝ հարձակման հետևում կարող է կանգնած լինել արհեստական բանականության ոլորտի առաջատար լաբորատորիաներից մեկը՝ հաշվի առնելով գործակալի բարձր բարդությունը։
«Պարզվեց՝ հենց այդպես էլ կա։ Պարզապես ապշեցուցիչ է, որ այս ամենը տեղի է ունեցել լիովին ինքնավար կերպով»,- նշել է Դելանգը։