Գերմանիայում դատարանի առաջ կկանգնի 58-ամյա նիդեռլանդացի նեոնացիստ Շտեֆան Վեյկամպը, որը հայտնի է Ադոլֆ Հիտլերի արտաքին տեսքը կրկնօրինակելու համար։
Ինչպես հայտնում է Bild-ը, Մյունստերի դատախազությունը նրա դեմ մեղադրանք է առաջադրել՝ ատելություն հրահրելու համար։ Պատճառը եղել է Մյունստերի գլխավոր երկաթուղային կայարանի մոտ անցկացված ցույցի ժամանակ տված հարցազրույցը։
Հարցազրույցի ընթացքում Վեյկամպը հրապարակային կերպով գովաբանել է նացիստական Գերմանիայի առաջնորդ Ադոլֆ Հիտլերին՝ նրան անվանելով «հանճար» և «աշխարհի հրաշալիք»։
Դատախազության գնահատմամբ՝ նման հայտարարությունները չեն համարվում խոսքի ազատության շրջանակում թույլատրելի և կարող են ընկնել Գերմանիայի քրեական օրենսդրության այն հոդվածի ներքո, որը վերաբերում է նացիստական ռեժիմի հավանությանը, փառաբանմանը կամ արդարացմանը։
Վեյկամպը երկար ժամանակ հայտնի է Գերմանիայի աջ ծայրահեղական շրջանակներում։ Նա մասնակցել է նեոնացիստական միջոցառումների և կապեր է ունեցել այժմ լուծարված «Die Rechte» («Աջերը») կուսակցության հետ։
Դատարանի նիստը նշանակված է հուլիսի 24-ին։ Եթե մեղադրյալը չներկայանա, դատարանը կարող է որոշում կայացնել նրա բացակայությամբ կամ նրա նկատմամբ կիրառել ձերբակալման միջոց։