Գագիկ Ծառուկյանին առաջադրված մեղադրանքը որևէ հանցագործություն չի պարունակում։ Այս մասին դատարանի բակում լրագրողների հետ զրույցում հայտարարել է Ծառուկյանի փաստաբան Երեմ Սարգսյանը՝ դատական նիստի ավարտից հետո։
Փաստաբանի խոսքով՝ իրավապահները Ծառուկյանին մեղադրում են Իրանի Իսլամական Հանրապետության քաղաքացիներից հափշտակություն կատարելու և փողերի լվացման մեջ, սակայն, ըստ նրա, այդ պնդումները չեն համապատասխանում իրականությանը։
«Իրենք ասում են, իբրև, Ծառուկյանը Իրանի Իսլամական Հանրապետության քաղաքացիներից հափշտակություն է արել և փողերի լվացում է կատարել։ Մենք դատարանում հստակ հիմնավորել ենք, որ այդ անձինք փաստաթղթեր են ստորագրել, որ իրենք են պարտք Ծառուկյանին, և պարտավորվել են այդ գումարները վերադարձնել մինչև 2026 թվականը»,- ասել է Սարգսյանը։
Նա նշել է, որ Իրանի դատարանն այդ հարցով արձանագրել է, որ հանցագործության փաստ չկա։
«Ինչ-որ իրենք ներկայացնում են, ակնհայտ է, որ հանցագործություն գոյություն չունի։ Իրանցին ասել է՝ Ծառուկյանը ինձ չի խաբել, ՀՀ իրավապահներն ասում են՝ չէ, Ծառուկյանն է խաբել»,- նշել է փաստաբանը։
Դատական նիստը, որի ընթացքում քննարկվում է ԲՀԿ առաջնորդ Գագիկ Ծառուկյանի խափանման միջոցի հարցը, ավարտվել է։ Դատարանը հեռացել է խորհրդակցական սենյակ։
Ավելի վաղ հաղորդվել էր, որ Երևանի ընդհանուր իրավասության դատարանը՝ դատավոր Գարիկ Աբելյանի նախագահությամբ, քննում է Ծառուկյանի նկատմամբ կալանավորումը որպես խափանման միջոց ընտրելու միջնորդությունը։
Հիշեցնենք՝ ավելի վաղ Քննչական կոմիտեի, ԱԱԾ-ի, ՊԵԿ-ի և ոստիկանության աշխատակիցները համատեղ խուզարկություններ էին իրականացրել Գագիկ Ծառուկյանին, նրա ընտանիքին պատկանող ընկերություններում, մասնավոր տարածքներում և նրա հետ առնչվող անձանց բնակարաններում։ Քննչական գործողություններից հետո Ծառուկյանը ձերբակալվել էր։