Ռուսաստանի շուկային չի սպառնում ալկոհոլային խմիչքների պակաս Հայաստանից ներմուծման սահմանափակումների սահմանումից հետո, «Պոդյոմ» հրատարակությանը ասել է լրագրող և ալկոհոլային խմիչքների շուկայի հետազոտող Դենիս Պուզիրևը, գրում է finance.mail.ru–ն։
Ինչպես բացատրել է փորձագետը, Ռոսպոտրեբնադզորի կողմից երեք հայկական ընկերությունների (Վեդի-Ալկո, Աբովյանի կոնյակի գործարան և Շահնազարյանի գինու և կոնյակի տուն) արտադրանքի ներմուծման և բաշխման վրա դրված արգելքը չի ազդում բոլոր արտադրողների վրա։ Ցանկում չեն ներառվել Ռուսաստան կոնյակի խոշորագույն մատակարարները՝ «Արարատ» գործարանը և Երևանի «Նոյ» գինու և կոնյակի գործարանը։ Պուզիրևի խոսքով նշվածներից բացի շուկայի մյուս մասնակիցները գործում են զգալիորեն ավելի փոքր ծավալներով։
Փորձագետը նաև նշել է, որ Ռուսաստանի ալկոհոլային խմիչքների շուկայի դինամիկան ցույց է տալիս կոնյակի կատեգորիայի նկատմամբ հետաքրքրության անկում։ Դա տեղի է ունենում այդ խմիչքի նվազագույն գնի բարձրացման և մրցակցության աճի ֆոնին։ Դա հիմնավորելու համար Պուզիրևը մեջբերել է Հայաստանի վիճակագրությունը, որտեղ կոնյակի արտադրությունը անցյալ տարի նվազել է 27%-ով։
Մասնագետի խոսքով՝ ռուսական շուկայի կորուստը ֆինանսական աղետ չի լինի հայ գինեգործների և կոնյակ արտադրողների համար։ Նա կարծում է, որ նրանք արագ կհարմարվեն իրավիճակին և կվերակողմնորոշվեն նոր շուկաներում։ «Այսպիսով, ես չէի անհանգստանա հայ արտադրողների ապագայի համար. երկիրը արտադրում է լավ գինի և կոնյակ, և կան երկարատև ավանդույթներ», – եզրափակել է փորձագետը։
Հիշեցնենք, որ «Ռոսպոտրեբնադզորը» (Սպառողների իրավունքների պաշտպանության և մարդու բարեկեցության վերահսկողության դաշնային ծառայությունը) նախկինում հայտարարել էր երեք արտադրողներից հայկական կոնյակների և գինիների ներմուծման և վաճառքի արգելքի մասին։ Գործակալությունն իր որոշումը հիմնավորել էր վերոնշյալ արտադրողների խմիչքներում Եվրասիական տնտեսական միության (ԵԱՏՄ) տեխնիկական կանոնակարգերի խախտումների հայտնաբերմամբ առանց նշելու խախտումների կոնկրետ բնույթը։
Նյութը հրապարակման պատրաստեց Կամո Խաչիկյանը