Ֆրանսիայի նախագահ Էմանուել Մակրոնը հայտարարել է Իրանի և ԱՄՆ նախագահներ Մասուդ Փեզեշքիանի ու Դոնալդ Թրամփի հետ ունեցած իր առանցքային հեռախոսազրույցների մասին։ Ֆրանսիայի առաջնորդը կողմերին կոչ է արել անհապաղ վերադառնալ Իսլամաբադում ընդհատված բանակցություններին, հստակեցնել առկա թյուրիմացությունները և խուսափել լարվածության նոր էսկալացիայից։
Մակրոնն ընդգծել է, որ խաղաղության գործընթացի համար կենսական են երկու նախապայմաններ. նախ՝ հրադադարի ռեժիմի խիստ պահպանումը, որը պետք է ներառի նաև Լիբանանը, և երկրորդ՝ Հորմուզի նեղուցի անհապաղ ու անվերապահ վերաբացումը՝ առանց որևէ լրացուցիչ վերահսկողության կամ վճարների։ Ըստ նախագահի՝ միայն այս պայմանների ապահովման դեպքում հնարավոր կլինի արագորեն վերսկսել քաղաքական երկխոսությունը։
Այս համատեքստում Ֆրանսիան և Մեծ Բրիտանիան այս ուրբաթ Փարիզում կանցկացնեն խոշոր համաժողով (տեսակապի միջոցով), որին կմասնակցեն հակամարտությանը չմասնակցող այն երկրները, որոնք պատրաստ են միանալ բազմակողմ պաշտպանական առաքելությանը։ Այս նոր նախաձեռնության նպատակն է լինելու վերականգնել ազատ նավագնացությունը նեղուցում՝ հենց որ անվտանգային պայմանները թույլ տան։