Լուսնի ամենահին և ամենամութ խառնարանները կարող են թաքցնել ամենամեծ քանակի սառույց։ Սա շատ լավ լուր է ապագա տիեզերագնացների համար։ Նոր հետազոտությունները ցույց են տալիս, որ Լուսնի հարավային բևեռում գտնվող մշտապես ստվերում մնացող խառնարաններում պահված ջրի սառույցը չի հայտնվել մեկ մեծ իրադարձության արդյունքում։ Ավելի հավանական է, որ այն կուտակվել է աստիճանաբար՝ միլիարդավոր տարիների ընթացքում։
Բայց այստեղ կա հետաքրքիր շրջադարձ. պարզվում է՝ այդ «մշտական» ստվերները իրականում միշտ չէ, որ մշտական են եղել։ Լուսնի թեքության փոփոխությունները ժամանակի ընթացքում փոխել են արևի լույսի անկյունը։ Արդյունքում՝ խառնարաններ, որոնք 3 միլիարդ տարի առաջ ամբողջությամբ մութ ու սառն էին և կարող էին պահպանել սառույց, այսօր կարող են արդեն լուսավորվել, իսկ որոշ ուրիշներ՝ հակառակը, նոր են հայտնվել ստվերում։
Այս բացահայտումները հատկապես կարևոր են հիմա, երբ ակտիվացել են Լուսնի հետազոտությունները՝ «Արտեմիս» ծրագրի հաջողությունների ֆոնին։ Այսօր արդեն բազմաթիվ առաքելություններ հաստատել են՝ Լուսնի վրա իսկապես կա սառույց։ Իսկ դա անգնահատելի ռեսուրս է ապագա բնակեցման համար։ Ջուրը կարելի է օգտագործել ոչ միայն խմելու համար, այլ նաև բաժանել ջրածնի և թթվածնի՝ ստանալով վառելիք և շնչելու օդ։ Այնուամենայնիվ, մի կարևոր հարց դեռ բաց է՝ որտեղի՞ց է առաջացել այդ ջուրը։