Բրիտանական Lloyds բանկային խումբը տնօրենների խորհրդի գործունեության մեջ ներդրել է արհեստական բանականության (ԱԲ) վրա հիմնված տեխնոլոգիա։
The Sunday Times-ի փոխանցմամբ՝ սա Միացյալ Թագավորության FTSE 100 ցուցակի խոշորագույն ընկերությունների շարքում առաջին դեպքն է, երբ նմանատիպ համակարգը կիրառվում է բարձրագույն ղեկավար մարմնի մակարդակով։ Արհեստական բանականությամբ օժտված բոտը ստեղծվել է Board Intelligence խորհրդատվական ընկերության կողմից։ Ծրագրի առանցքային նպատակն է բարձրացնել կառավարման արդյունավետությունը, արագացնել մեծածավալ տվյալների վերլուծությունը և նվազեցնել սուբյեկտիվ գործոնների ազդեցությունը կարևորագույն որոշումների կայացման ընթացքում։
Lloyds-ի կորպորատիվ կառավարման գծով տնօրեն Նիկոլա Փութլենդը նշել է, որ ԱԲ գործիքների փորձարկումը միտված է քննարկումների որակի բարելավմանը։ Ի տարբերություն սովորական չատ-բոտերի, այս հատուկ համակարգը նախատեսված է թոփ-մենեջերների համար և հարմարեցված է գաղտնի կորպորատիվ ու շուկայական տվյալների հետ անվտանգ աշխատանքին։ Ընկերությունում ընդգծում են, որ տեխնոլոգիայի կիրառումն իրականացվելու է պատասխանատվությամբ և զգուշավորությամբ։
«Մենք տեսնում ենք արհեստական բանականության իրական ներուժը տնօրենների խորհրդի որոշումների կայացման գործում, երբ այն օգտագործվում է ուշադիր և պատասխանատու կերպով։ Մենք փորձարկում ենք արհեստական բանականության գործիքներ՝ ավելի արագ վերլուծության միջոցով քննարկումներին ավելի լավ նախապատրաստվելու համար», – ասել է բանկի կորպորատիվ կառավարման տնօրեն Նիկոլա Փութլանդը։ Ինչպես նշվում է հրապարակման մեջ, Board Intelligence-ի բոտը նախատեսված է հատուկ ավագ մենեջերների համար, որոնք աշխատում են զգայուն կորպորատիվ և շուկայական տվյալների հետ, ի տարբերություն ավելի տարածված այլընտրանքների, ինչպիսիք են ChatGPT-ը կամ Gemini-ն։