Ֆրանսիայի նախագահ Էմանուել Մակրոնը հանդես է եկել ծավալուն հայտարարությամբ՝ ամփոփելով Մերձավոր Արևելքում տիրող իրավիճակի շուրջ իրականացված բարձր մակարդակի հեռախոսազրույցների շարքը։ Ելիսեյան պալատի ղեկավարը հայտնել է, որ առանձնազրույցներ է ունեցել Իրանի նախագահ Մասուդ Փեզեշքիանի և ԱՄՆ նախագահ Դոնալդ Թրամփի հետ՝ բարձր գնահատելով հրադադար հաստատելու նրանց որոշումը և այն անվանելով «հնարավոր լավագույն քայլը»։
Մակրոնն ընդգծել է, որ հրադադարի լիարժեք պահպանումը բոլոր ճակատներում, ներառյալ Լիբանանում, անկյունաքարային նշանակություն ունի գործընթացի վստահելիության և տևականության համար։ Ըստ նրա՝ այս դադարը պետք է ճանապարհ հարթի դեպի համապարփակ բանակցություններ, որոնք ի վիճակի կլինեն երաշխավորել տարածաշրջանի բոլոր երկրների անվտանգությունը։
«Խոսել եմ և՛ Մասուդ Փեզեշքիանի, և՛ Դոնալդ Թրամփի հետ։ Երկուսին էլ ասել եմ, որ հրադադար ընդունելու իրենց որոշումը լավագույնն էր։ Հույս հայտնեցի, որ հրադադարը լիովին կհարգի հակամարտող կողմերից յուրաքանչյուրը՝ բախման բոլոր ոլորտներում, այդ թվում՝ Լիբանանում։ Սա անհրաժեշտ պայման է, որպեսզի հրադադարը լինի հավաստի և երկարատև»,- գրել է Մակրոնը իր X-ի էջում։