«Ուժեղ Հայաստան» կուսակցության խորհրդի անդամ Դավիթ Ղազինյանի ու փաստաբան Արամ Օրբելյանը հանդես են եկել ասուլիսով, որտեղ ներկայացրել են «Հայաստանի էլեկտրական ցանցեր»-ի շուրջ տեղի ունեցող վերջին զարգացումները։
«Վարչական դատարանում բողոքարկել էինք ՀԾԿ որոշումը, որով որոշվել էր ՀԷՑ-ին զրկել լիցենզիայից։ 7 կետ էր դրված լիցենզիայից զրկելու համար, ընդ որում 6-ն առանձին հիմքեր են, 7-րդ-ը՝ 8 կետից բաղկացած հիմք է։ Դատական նիստերը բավականին ինտենսիվ են եղել, վերջին դատական նիստը տևել է 13 ժամ, ընդորում դրա նախորդ օրերին ևս ունեցել ենք նիստեր, որտեղ հնարավորություն ենք ունեցել քննարկել ապացույցները»,- նշել է փաստաբան Արամ Օրբելյանը։
Վերջինիս խոսքով՝ Հանրային ծառայությունները կարգավորող հանձնաժողովը չի կարողացել խախտումներն արձանագրել հստակ ապացույցներով։
«Ակնկալվում էր, որ Հանրային ծառայությունները կարգավորող հանձնաժողովը պետք է շատ հստակ ասի՝ այս խախտումը հաստատվում է այս ապացույցով, այս ապացույցով, բայց նրանք դրան պատրաստ չէին։ Ամեն անգամ ամեն հարց քննարկելուց բավականին երկար ապացույցներն էին նայում, փորձում էին ասել՝ որ փաստաթուղթը որի հետ համադրենք։ Եվ արդյունքում ակնհայտ էր, որ հանգամանքները չեն հաստատվում»,- ընդգծել է փաստաբանը։