Ռուսաստանում Իրանի դեսպան Քազեմ Ջալալին ՏԱՍՍ-ին տված հարցազրույցում թվարկել է այն դրույթները, որոնք Թեհրանն անհրաժեշտ է համարում ԱՄՆ-ի հետ հարաբերությունների կարգավորման համար։ Ըստ դիվանագետի՝ այս կետերի կատարումը պետք է հիմք հանդիսանա հրադադարի ցանկացած նախաձեռնության համար։
Իրանի պահանջների ցանկը ներառում է՝
– «Ագրեսիայի և ահաբեկչական գործողությունների» վերջնական և լիակատար դադարեցում։
– Ագրեսիայի և պատերազմի կրկնությունը բացառող «օբյեկտիվ և արժանահավատ երաշխիքների» տրամադրում։
– Նյութական և բարոյական վնասի լիարժեք փոխհատուցում։
– Հորմուզի նեղուցում Իրանի իրավական իրավասության (յուրիսդիկցիայի) հարգում՝ «միջազգային ծովային անվտանգության պաշտպանության նպատակով»։
Ջալալին նշել է, որ Թեհրանը ողջունում է միջնորդական ջանքերը, սակայն խաղաղության հաստատումը շաղկապում է նշված պարտավորությունների կատարման հետ։
Նա հավելել է, որ Իրանը կշարունակի գործել «ինքնապաշտպանության իրավունքի» շրջանակում մինչև սպառնալիքի աղբյուրի վերացումը և իր դիվանագիտական քայլերը կհամակարգի ռազմավարական գործընկերների, այդ թվում՝ Ռուսաստանի հետ։
Մեկնաբանելով ԱՄՆ-ի հնարավոր ցամաքային ներխուժման ռիսկերը՝ դեսպանը հայտարարել է զինված ուժերի պատրաստակամության մասին՝ «Իրանի տարածքը ագրեսորի ուժերի համար գերեզմանոց դարձնելու» հարցում։
Նրա գնահատմամբ՝ ներխուժման հենց փաստը, որն արդեն ավելի քան չորս շաբաթ է տևում, ապացուցել է նման հաշվարկների «միամտությունը»։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի Գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի թիվը ժամ առ ժամ փոխվում է։
