27 մարտի 2026 – 10:54 AMT
PanARMENIAN.Net – Վրաստանից Հայաստան եկող գազատարի 5․5 կիլոմետրանոց հատվածը կտեղափոխվի Հայաստանի խնդրանքով: Դիմումն արդեն ներկայացվել է Վրաստանի բնական պաշարների նախարարության շրջակա միջավայրի վերահսկողության վարչություն:
ՀՀ դիմումը պայմանավորված է նրանով, որ գազատարի հայկական հատվածը գտնվում է վրաց-հայ-ադրբեջանական եռակողմ սահմանային գոտում և ականապատվել է 1990-ականներին, հայտնում է Sputnik-georgia-ն:
Խողովակաշարը կտեղափոխվի մի քանի կիլոմետր և կմիանա հայկական կողմից կառուցված նոր հատվածին։
Հիմնավորման մեջ ասվում է․ «Ելնելով այն իրողությունից, որ այս հատվածում անհնար է պահպանել անվտանգության նվազագույն չափանիշները և իրականացնել վերանորոգման աշխատանքներ, եռակողմ միջպետական համաձայնագրի հիման վրա որոշվել է գազատարի խնդրահարույց հատվածը հանել ականապատ տարածքից և անվտանգ հեռավորության վրա կառուցել նոր գազատար»։
Վրաստանից եկող գազատարով է ՀՀ հասնում ռուսական գազը, որը բավարարում է երկրի գազի պահանջարկի մեծ մասը: