Թեհրանը հայտարարել է, որ կհարվածի ԱՄՆ-ի էներգետիկ ենթակառուցվածքներին Մերձավոր Արևելքում, եթե հարձակում իրականացվի Իրանի էլեկտրակայանների վրա։
«Եթե հակառակորդը հարվածի Իրանի էներգետիկ ենթակառուցվածքի օբյեկտներին, մենք կհարվածենք Մերձավոր Արևելքում ԱՄՆ-ին պատկանող էներգետիկ և տեղեկատվական ենթակառուցվածքների բոլոր օբյեկտներին, ինչպես նաև տեխնոլոգիական կենտրոններին և աղազերծման կայաններին»,- ՏԱՍՍ-ը մեջբերում է Իրանի ԶՈւ Գլխավոր շտաբի հայտարարությունը։
Ավելի վաղ ԱՄՆ նախագահ Դոնալդ Թրամփ հանդես էր եկել վերջնագրով՝ հայտարարելով, որ եթե Իրանը «48 ժամվա ընթացքում ամբողջությամբ և առանց սպառնալիքների չբացի Օրմուզի նեղուցը, ապա ԱՄՆ-ը կհարվածի և կոչնչացնի Իրանում գտնվող տարբեր էլեկտրակայաններ՝ սկսելով ամենախոշորից»։
Փետրվարի 28-ին ԱՄՆ-ն և Իսրայելը ռազմական գործողություն էին սկսել Իրանի դեմ: Իսլամական հեղափոխության պահապանների կորպուսը (ԻՀՊԿ, Իրանի զինված ուժերի էլիտար ստորաբաժանում) հայտարարել էր Իսրայելի վրա հարձակման լայնածավալ պատասխան գործողության մասին: Իրանը հարվածներ էր հասցրել Բահրեյնում, Հորդանանում, Կատարում, Քուվեյթում, ԱՄԷ-ում և Սաուդյան Արաբիայում ԱՄՆ թիրախներին: Հակամարտությունից տուժել են տարածաշրջանի բոլոր երկրները։
