20 մարտի 2026 – 13:46 AMT
PanARMENIAN.Net – Հայաստանը վստահելի գործընկեր է Եվրամիության համար, հայտարարել է ԵՄ ընդլայնման հարցերով հանձնակատար Մարթա Կոսը ՆԳ նախարար Արփինե Սարգսյանի հետ հանդիպմանը:
Կոսը գերազանց է գնահատել ՆԳ նախարարության և անձամբ նախարար Սարգսյանի գործունեությունը ԵՄ-Հայաստան վիզաների ազատականացման գործընթացում։ Նա ընդգծել է, որ ներկայումս ՀՀ-ն միակ երկիրն է, որի հետ ԵՄ-ն այս ուղղությամբ ակտիվ երկխոսություն է վարում։
Նախարարը բարձր է գնահատել Հայաստան-Եվրամիություն զարգացող հարաբերությունները՝ շեշտելով, որ այս ամսվա ընթացքում արդեն երկրորդ ԵՄ հանձնակատարի այցն է Հայաստան, ինչը վկայել է համագործակցության ակտիվության և արդյունավետության մասին։
Անդրադառնալով ԵՄ վիզաների ազատականացման գործընթացին՝ նախարար Սարգսյանը նշել է, որ Հայաստանը մայիսին ստացել է առաջընթացի գնահատման վերջնական զեկույցը և վստահություն է հայտնել, որ երկու կողմերն էլ արձանագրել են գոհացուցիչ արդյունքներ։
Որպես հայկական կողմի գլխավոր բանակցող՝ Սարգսյանը ներկայացրել է երկխոսության մեկնարկից ի վեր արձանագրված ملمելի ձեռքբերումները և վերահաստատել է, որ Հայաստանը լիարժեք հանձնառու է իրականացնել գործողությունների ծրագիրը բարձր մակարդակով և ամբողջ ծավալով։
Նախարարը կարևորել է միգրացիայի և սահմանների համապարփակ կառավարման, ինչպես նաև փաստաթղթերի անվտանգության ապահովման ուղղությամբ իրականացվող շարունակական աշխատանքները։ Միաժամանակ ընդգծվել է Եվրոպոլում Հայաստանի կողմից կապի սպայի նշանակման նշանակությունը իրավապահ ոլորտում համագործակցության զարգացման տեսանկյունից։
Անդրադարձ է կատարվել նաև Միջազգային հանրապետական ինստիտուտի (IRI) նախաձեռնությամբ իրականացված ուսումնասիրությանը, ըստ որի՝ ՆԳՆ ոստիկանության նկատմամբ հանրային վստահության մակարդակը էականորեն աճել է։ Հանդիպման ընթացքում քննարկվել են նաև անվտանգության, հիբրիդային սպառնալիքներին հակազդելու և կիբեռհարձակումների դեմ պայքարին վերաբերող հարցեր։
Փոխվարչապետ Մհեր Գրիգորյանը և Երևանում գտնվող ԵՄ ընդլայնման հարցերով հանձնակատար Մարթա Կոսը ստորագրել են Դիմակայունության և աճի պլանի ներքո 2025-2027 թվականների ֆինանսավորման համաձայնագիրը:
Գրիգորյանն ասել է, որ հանդիպման ընթացքում մանրամասն անդրադարձել են Հայաստանում իրականացվող ոլորտային բարեփոխումների ընթացքին, որոնք բխել են Համապարփակ և ընդլայնված գործընկերության համաձայնագրով ստանձնած պարտավորություններից: