«Հյուսիս–Հարավ» ուղղության հետ կապված Իրանը խոսել է Հայաստանի պաշտոնատար անձանց հետ, ու Իրանում վստահ են, որ այդ ուղին կարող է երկու ճյուղ ունենալ
ԵՐԵՎԱՆ, 2 մարտի․/ԱՌԿԱ/․ Հայաստանը լավ պոտենցիալ և ներուժ ունի հաղորդակցական ուղիների և տրանզիտային ուղիների տեսանկյունից։
Այս մասին այսօր կայացած ասուլիսի ժամանակ հայտարարել է ՀՀ-ում Իրանի դեսպան Խալիլ Շիրղոլամին։
Նա նշել է, որ «Հյուսիս–Հարավ» ուղղության հետ կապված Իրանը խոսել է Հայաստանի պաշտոնատար անձանց հետ, ու Իրանում վստահ են, որ այդ ուղին կարող է երկու ճյուղ ունենալ։
«Այս ճյուղերից մեկը կարող է Հայաստանի համար տնտեսական շատ լավ հնարավորություններ ստեղծել Պարսից և Օմանի ծոցերից Հայաստանի տարածքով, Նախիջևանով դեպի Վրաստան ուղղությունն է», – նշել է Շիրղոլամին:
Ըստ դեսպանի՝ այս ճյուղը կարող է Հայաստանի տրանզիտային դերակատարությունը մի քանի անգամ ավելացնել։
Նրա խոսքով՝ ուշադրությունը պետք է լինի թե՛ հյուսիս-հարավ, թե՛ արևմուտք-արևելք հաղորդակցական ուղիների նկատմամբ։