Քանաքեռի Սուրբ Աստվածածին եկեղեցին, որը պատկանում է Հայաստանի ԶՈՒ Հոգևոր առաջնորդությանը, այսօր առավոտից գտնվում է Ռազմական ոստիկանության մեքենայի հսկողության տակ, հայտնել է Տեր Պսակ քահանա Մկրտչյանը՝ չբացառելով, որ ՌՈ ծառայողները կարող են խոչընդոտել հոգևորականների մուտքը եկեղեցի։
ՊՆ մամուլի խոսնակ Արամ Թորոսյանը Armenia Today-ին պարզաբանեց, որ Քանաքեռի Սուրբ Աստվածածին եկեղեցու տարածքում ՌՈ-ի բնականոն ծառայություն է ընթանում։
«Երևանի նշված վարչական շրջանում մի քանի զորամաս կա»,- նշեց նա։
ՀՀ զինված ուժերում դադարեցվելու է Հայ Առաքելական եկեղեցու կողմից նշանակված հոգևոր ծառայության ներկայացուցիչների գործունեությունը՝ ըստ պաշտպանության նախարար Սուրեն Պապիկյանի որոշման։
Հունվարի 30-ին ԱԺ «Հայաստան» խմբակցության պատգամավոր Գեղամ Մանուկյանը հայտնել էր, որ Պապիկյանի հրամանով փետրվարի 1-ից Հայաստանի զինված ուժերում այլևս չի գործելու հոգևոր ծառայությունը։ Տարբեր հոգևորականներ «Ազատության»-ը պատմել էին, որ հրամանատարները ճնշում են գնդերեցներին, փորձում ներքաշել եկեղեցու «բարենորոգման արհեստական շարժման մեջ»:
