30 հունվարի 2026 – 16:25 AMT
PanARMENIAN.Net – Սննդամթերքի անվտանգության տեսչական մարմնի ղեկավար Տիգրան Պետրոսյանն ամփոփիչ ասուլիսում հայտնել է, որ 2025 թվականին մսի իրացման կետերում մշտադիտարկումների թիվն աճել է, իսկ խախտումներինը՝ նվազել։
«2025 թվականին իրականացվել է 5301 անասնահամաճարակային մշտադիտարկում, որից 4515-ը՝ մսի իրացման կետերում, իսկ 786-ը՝ սպանդանոցներում, անասնապահական ֆերմաներում, կաթի ընդունման կետերում։ Մսի իրացման կետերում նմանատիպ քանակությամբ մշտադիտարկում անելը մեծ թիվ է կազմում, բայց խախտումների թիվը նվազել է, ինչն ուրախացնող է ու համարում ենք արդյունավետ պայքարի արդյունք։ Մշտադիտարկումները և վերահսկողությունը շարունակական են լինելու»,- ասել է ՍԱՏՄ ղեկավարը, հայտնում է Sputnik Արմենիան:
Նրա խոսքով՝ մսի իրացման կետերում կատարված ստուգումների արդյունքում խախտումներ են հայտնաբերվել 314 կետում, որոնցից 265-ի նկատմամբ կիրառվել է վարչական պատասխանատվություն։
Պետրոսյանը նշել է, որ հայտնաբերված խախտումների հետևանքով շուկայից առգրավվել և ոչնչացվել է գրեթե 8 տոննա միս։
Սպանդանոցների թեմային անդրադառնալով՝ ՍԱՏՄ ղեկավարը հայտնել է, որ 2024 թվականին ՀՀ-ում գործել է 139 սպանդանոց, իսկ 2025-ին՝ 128։ Թեև դրանց թիվը փոքր-ինչ կրճատվել է, սակայն սպանդանոցներում իրականացված մորթի ծավալը կազմել է 31,000 տոննա՝ նախորդ տարիների համեմատ աճ գրանցելով։
ՍԱՏՄ ղեկավարը նշել է՝ սննդամթերքի շուկայում ամենատարածված խախտումները վերաբերել են պիտանելիությանը, մսի ծագմանը և սանիտարական պայմաններին, հայտնում է Aysor.am-ը։
2025 թվականին Սննդամթերքի անվտանգության տեսչական մարմնի կողմից իրականացվել է 7569 վերահսկողական միջոցառում, որոնց արդյունքում արձանագրվել է 1819 խախտում։ Այս մասին հայտնել է ՍԱՏՄ ղեկավար Տիգրան Պետրոսյանը՝ մամուլի ասուլիսի ժամանակ։
«Հիմնական խախտումներն են՝ պիտանելիության ժամկետն անց կամ վտանգավոր սննդամթերքի իրացումը, ոչ սպանդանոցային ծագման մսի վաճառքը։ Հաճախ խախտվում են պահման պայմանները, անձնական հիգիենայի և սանիտարահիգիենիկ նորմերի, ինչպես նաև աշխատակիցների նախնական և պարբերական բժշկական զննությունների պարբերականությունը։ Հաճախ բացակայում են անվտանգության հավաստող փաստաթղթերը»,- նշել է Տիգրան Պետրոսյանը։
Նրա խոսքով՝ վերահսկողական աշխատանքները շարունակվելու են նաև 2026 թվականին՝ նպատակ ունենալով բարձրացնել սննդամթերքի անվտանգության մակարդակը և կանխել սպառողի առողջության համար ռիսկային իրավիճակները։
Տիգրան Պետրոսյանը նշել է, որ 2025 թվականին Սննդամթերքի անվտանգության տեսչական մարմինը արձանագրել է սննդային գործոնով պայմանավորված թունավորման 21 դեպք, որոնց հետևանքով տուժել է 64 քաղաքացի, հայտնում է Factor.am-ը:
«Սննդային թունավորումները մեր գլխավոր մտահոգություններից են։ Հիմնական դեպքերը գրանցվել են հանրային սննդի օբյեկտներում՝ սանիտարահիգիենիկ նորմերի խախտման, խաչաձև աղտոտվածության պատճառով։ Ամենաշատ տուժածները եղել են շաուրմայանոցներից մեկում՝ թունավորվել է 12 մարդ։ Մնացած բոլոր տեղերում թունավորվողները եղել են մեկ-երկու հոգի»,- ասել է Պետրոսյանը։
Նրա խոսքով՝ նման դեպքերին հակազդելու ամենաարդյունավետ միջոցը սննդի անվտանգության համակարգերում ՀԱՍՊ (Hazard Analysis and Critical Control Points) համակարգի ներդրումն է, որը միջազգային փորձով արդեն ապացուցել է իր արդյունավետությունը։
Անդրադառնալով վարչական պատասխանատվության միջոցներին՝ Պետրոսյանը նշել է, որ 2025 թվականին կայացվել է արտադրական գործունեության կասեցման 200 որոշում, որոնցից 131-ն արդեն վերացվել է։
Տարվա ընթացքում կայացվել է նաև վարչական տուգանքի վերաբերյալ 1455 որոշում, որոնց շրջանակում նշանակված տուգանքների ընդհանուր գումարը կազմել է ավելի քան 339 միլիոն դրամ։ Տարվա ավարտի դրությամբ գանձվել է մոտ 270 միլիոն դրամ։
«Այստեղ ևս 2023 և 2024 թվականների համեմատությամբ մեր թիվը եռակի, կրկնակի մեծացել է։ Բայց մեր գերնպատակը գումարների գանձումը և մեծ գումարներ հավաքագրելը չէ, մեզ ընդհակառակը պետք է պատկեր, որպեսզի վերահսկողության ոլորտում լինի կայուն իրավիճակ»,- ընդգծել է ՍԱՏՄ ղեկավարը։
Սպանդանոցային մորթի պարտադիր պահանջը Հայաստանում ուժի մեջ է մտել 2023 թվականի դեկտեմբերի 6-ից։ Այդ ժամանակից ի վեր արգելված է շուկայում վաճառել ցանկացած կենդանական ծագման հումք կամ մթերք, եթե այն ստացվել է ոչ սպանդանոցային պայմաններում։ Այս կարգը խախտելու դեպքում միսը ենթակա է առգրավման և ոչնչացման։ ՀՀ կառավարությունը սահմանել է մինչև 10 հազար դրամի պետական աջակցություն՝ սպանդանոցային մորթ իրականացնող ֆիզիկական անձանց համար։