Ռուսաստանի արտաքին գործերի նախարար Սերգեյ Լավրովը թուրքական լրատվամիջոցներին տված հարցազրույցում հայտարարել է, որ Ուկրաինայի նախագահ Վոլոդիմիր Զելենսկու կողմից առաջարկած հրադադարն անընդունելի է Ռուսաստանի համար։
«Բազմիցս ասվել է, և նախագահ Վլադիմիր Պուտինը հաճախ է մեզ հիշեցրել, որ Զելենսկու կողմից առաջարկած հրադադարը, նույնիսկ 60 օրով, և ցանկալի է՝ ավելի երկար, մեզ համար անընդունելի է»,- նշել է նա։
Արտգործնախարարն ընդգծել է, որ հատուկ ռազմական գործողության ընթացքում դիվանագիտական ջանքերի նախորդ բոլոր ժամանակահատվածներն ավարտվել են նրանով, որ ցանկացած հրադադար անմիջապես օգտագործվել է Ուկրաինային նոր զենքով ապահովելու համար։
«Այժմ, անվտանգության երաշխիքների վերաբերյալ քննարկումների ժամանակ, որոնցով այդքան հպարտանում են Ուկրաինայի առաջնորդները, եվրոպացիները, ՆԱՏՕ-ի գլխավոր քարտուղար Մարկ Ռյուտեն և ՆԱՏՕ-ի ու Եվրամիության շատ նախարարներ, նրանք պնդում են, որ անվտանգության երաշխիքներն այս հակամարտության վերսկսումը կանխելու բանալին են։ Սա կլինի բոլորովին այլ «դռան» բանալի։ Որովհետև եթե նայեք, թե ինչ է քննարկվում, Զելենսկու ռեժիմի «տերերն» աշխատում են երաշխավորել այս անօրինական, ապալեգիտիմացված ռեժիմի անվտանգությունը, որի արմատները դրվել են 2014 թվականի փետրվարի պետական հեղաշրջման ժամանակ»,- շարունակել է Ռուսաստանի արտգործնախարարը։
Լավրովը հավելել է, որ Զելենսկու ռեժիմը և նրա իրավահաջորդները դեռևս կառավարում են Ուկրաինան և շարունակում են լինել արևմուտքի միջնորդներ, որոնք նախատեսված են մշտապես նյարդայնացնելու Ռուսաստանին և անվտանգության սպառնալիքներ ստեղծելու համար։